Polisie gereed vir optog oor buitelanders

Foto: Twitter

Foto: Twitter

Die polisie het gesê veiligheidsmaatreëls is getref om te verseker dat ʼn optog wat vandag in Pretoria gehou word uit protes teen die groot getal buitelanders in Suid-Afrika, vreedsaam verloop.

Geweld het egter alreeds vroegoggend in Atteridgeville opgevlam nadat betogers paaie met brandende bande en ander voorwerpe versper het. Sommige inwoners is sonder vervoer gelaat. Die polisie sê hy monitor die situasie.

Voorvalle van xenofobiese geweld het die afgelope paar weke in Rosettenville in Johannesburg en in Mamelodi en Atteridgeville in Pretoria voorgekom. Verskeie huise is aan die brand gesteek en talle winkels is geplunder. Altesaam 42 verdagtes is intussen in verband met hierdie voorvalle in hegtenis geneem.

ʼn Groep wat hulself die Mamelodi Concerned Residents noem sal vandag ʼn optog in Pretoria hou omdat inwoners ongelukkig is oor buitelanders in die land wat volgens hulle misdaad soos prostitusie en dwelmhandel die land inbring en Suid-Afrikaners van werksgeleenthede ontneem.

Foto: Twitter

Foto: Twitter

Brig. Vishnu Naidoo, woordvoerder van die polisie, het gesê polisiebeamptes is ontplooi al langs die roete van die optog tot by die plek waar die groep ʼn memorandum sal oorhandig. Die optog sal na verwagting om 10:00 op die hoek van Bloed- en 7de Straat begin en die groep sal na die departement van binnelandse sake in Johannes Ramokhoase-straat beweeg. Die optog sal na verwagting tot 15:00 duur.

“Ons wil ʼn beroep doen op almal wat aan die protesoptog deelneem om dit op ʼn vreedsame wyse te doen. Alle deelnemers moet ook kennis neem dat die dra van gevaarlike wapens verbied word en dat persone wat hierdie reël oortree strafregtelik vervolg kan word,” het Naidoo gesê. Hy het gesê enige persoon wat voel hul regte word op enige manier geskend, moet dit by die naaste polisiestasie aanmeld en nié reg in eie hande neem nie.

Lt.genl. Deliwe de Lange, die provinsiale polisiekommissaris in Gauteng, het gesê van die 42 verdagtes wat in verband met die xenofobiese geweld in hegtenis geneem is, was 27 buitelanders sonder die nodige dokumente. Een persoon is in hegtenis geneem vir die onwettige besit van ʼn vuurwapen terwyl 14 ander vasgetrek is vir dwelmbesit en dwelmhandel.

Foto: Twitter

Foto: Twitter

Volgens De Lange was inwoners van Rosettenville tot ʼn groot mate behulpsaam by die inhegtenisnemings deur die polisie van inligting te voorsien. Die polisie het Dinsdag ʼn blitslynnommer beskikbaargestel waar polisiekorrupsie en ander onwettige bedrywighede aangemeld kan word.

Intussen het pres. Jacob Zuma ook vandag ʼn beroep op optoggangers gedoen om nie gewelddadig te raak nie. “Die situasie het baie ernstiger geraak in die lig van die huidige dreigemente van geweld en voorvalle van intimidasie en vernietiging van eiendom wat op buitelanders in Suid-Afrika gemik is,” het die presidensie in ʼn verklaring gesê.

Zuma het die voorvalle van geweld veroordeel en ʼn beroep op die owerhede gedoen om te verseker dat die oortreders aan die pen ry. “Die president het twee weke gelede Nyanga in Kaapstad besoek, een van die plekke in die land waar die meeste misdaad voorkom. Hy sal ook ander gemeenskappe besoek om eerstehandse inligting te kry van die probleme op grondvlak met betrekking tot misdaad,” lui die verklaring.

Volgens Zuma neem hy kennis van die klagtes dat Suid-Afrikaanse maatskappye onwettige immigrante in diens neem. Hy het gesê die departement van binnelandse sake sal toeslaan op werkgewers wat onwettige immigrante in hul diens het, aangesien dit plaaslike inwoners in wedywering met buitelanders sit.

Hy het egter ʼn beroep op Suid-Afrikaners gedoen om nie buitelanders vir alle misdaad te blameer nie. “Baie buitelanders wat in Suid-Afrika woon is wetsgehoorsaam en dra positief tot die land se ekonomie by. Dit is verkeerd om alle buitelanders as dwelmhandelaars of mense-smokkelaars uit te maak,” het hy gesê.

“Kom ons bepaal wie hierdie misdade pleeg en werk saam met die regering om hulle in hegtenis te laat neem, sonder om te stereotipeer en onskuldige mense skade te berokken. Die dreigemente en teen-dreigemente op sosiale media moet end kry. Almal moet selfbeheersing uitoefen en die wette van die land respekteer.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Max

Wat is die sosio-ekonomiese impak op die RSA van tussen 8 en 11 miljoen ” gedokumeteerde” immigrante?

Regtig?

Wat z nou eintlik sê is: Los my maatjies…hulle brin stemme vir die cANCer!

Hendrik

Wel dit het nou begin en sal aanhou tot en verby die 2019 verkiesing

jennefer

Weet Maroela Media wat geword het van die saak waar 16 kinders ontvoer is? slawe of sex slawe?

Ilse

Ek stem saam jou Hendrik. Maar kan ook verstaan hoekom hulle so voel en ek voel ook so. Meeste van ons plaas moorde en misdaad is agv. buitelandse mense wat onwettig in ons land is. As hulle gevang word moet hulle dood terug gestuur word na hulle eie land toe.