Polisie krap kop oor drie se ‘wrede’ moord

Die motor se uitgebrande wrak. Foto: Verskaf / SAPD

Die Limpopo-polisie het ʼn volskaalse soektog van stapel gestuur na ʼn groep verdagtes wat drie mense Maandag “wreed” vermoor het.

Lt.kol. Moatshe Ngoepe, provinsiale polisiewoordvoerder, het gesê ʼn man en ʼn vrou in hul 30’s is na bewering vroeër die dag deur onbekende verdagtes ontvoer terwyl hulle in hul Toyota Tazz in die omgewing van die Makonde-nedersetting buite Thohoyandou was.

“Daarna het die moordenaars hulle in die kattebak van hul voertuig ingeboender en na ʼn afgeleë gebied naby die Matiyani-nedersetting gery. Daar is hulle noodlottig gewond en in hul voertuig aan die brand gesteek. Hulle het onherkenbaar verbrand,” het Ngoepe gesê.

Die polisie het ook op die liggaam van ʼn onbekende man ʼn paar meter van die toneel afgekom. Die man het verskeie skietwonde aan sy liggaam gehad.

“Die motief agter die voorval is steeds onbekend, maar dit sal deur nadere ondersoek vasgestel word en die moordenaars sal aangekeer word,” het Ngoepe gesê.

Lt.genl. Nneke Ledwaba, provinsiale polisiekommissaris, het die moorde ten sterkste veroordeel.

“Oortreders wat steeds besig is om dié barbaarse dade te pleeg word gewaarsku om hierdie sinnelose moorde op ons mense stop te sit. Daar is geen regverdigbare rede vir enigiemand om ʼn onskuldige lewe op so ʼn gruwelike manier te neem nie. Ons sal onverpoos werk om die verdagtes te soek en hulle aan die pen te laat ry,” het Ledwaba gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

21 Kommentare

jongste oudste gewildste
Vra net

Bring die doodstraf terug dan sal daar ander deuntjies gesing word. So maklik

DAVID

net soos hulle onverpoos aan plaas aanvalle werk?

Vra Net

Gaan hulle ook grond kry om te boer?

Vra maar net

My vraag, as hulle dan niks van ‘n lewe dink nie, hoekom kan die doodstraf dan nie aan hul opgelê word nie? Hulle het iemand se lewe geneem, so hoekom word hulle gevrywaar van die doodstraf (wat mos nou nie meer van toepassing is nie) Maar kan ons dit nie maar terugbring nie????

Theresa B

Bring die doodstraf terug, dan sal julle sien hierdie toedrag van sake sal afneem.