Polisie kyk glo hoe plakkers gebou beset

Die Goedehoop-kompleks in Brooklyn (Fotp: Communicare.co.za)

Daar heers groot kommer oor die polisie wat glo die afgelope naweek gestaan en toekyk het hoe die Goedehoop-kompleks in Brooklyn, Kaapstad, onder “georganiseerde kaping” deurgeloop het.

Volgens die verhuringsorganisasie wat dié kompleks besit, Communicare, is 24 van hul maatskaplike huurwoonstelle in dié kompleks Vrydagaand onwettig beset. Die “georganiseerde kaping” is glo gelei deur twee huurders wat by ander eiendomme van dié verhuringsorganisasie huur. Volgens die organisasie was die polisie op die toneel, maar het nie by die besetting ingegryp nie.

Kapt. FC van Wyk, woordvoerder van die polisie, sê die Maitland-polisie het omstreeks 19:50 ʼn klag van die Goedehoop-kompleks gekry.

“Polisiebeamptes het met veiligheidswagte en mense op die perseel gepraat,” bevestig Van Wyk. “Sake van onregmatige betreding en kwaadwillige beskadiging van eiendom is aanhangig gemaak.”

Van Wyk sê die ondersoek duur voort en nog niemand is in hegtenis geneem nie.

Volgens Communicare het die polisie hulle aangeraai om ingevolge die Wet op die Voorkoming van Onwettige Uitsetting en Onwettige Besetting (PIE) by die howe aansoek te doen om die onwettige besetting te hanteer, ondanks die teenwoordigheid van polisie ten tyde van die kaping.

Dan Plato, burgemeester van Kaapstad, sê egter die nasionale ramptoestand beperk tans die vermoë van howe om uitsettingsbevele toe te staan. “Dit sal bydra tot Communicare se uitdaging om die onregverdigheid van die geboukaping te hanteer,” sê Plato.

Communicare sukkel al sedert die begin van die jaar met onwettige besetters by die Goedehoop-kompleks. Volgens die organisasie het ʼn groep besetters Dinsdag (2 Maart) 18 woonstelle in die kompleks op gewelddadige wyse betree en onwettig beset.

“Oortreders het koevoete gebruik om die woonstelle te betree. Hierdie woonstelle was pas voorberei vir nuwe huurders om in te trek,” sê die organisasie. “Van die besetters was vroue en kinders.”

Communicare beklemtoon dat die besettings elke keer erg traumaties vir die huurders is.

Plato sê daar moet gevolge vir dié onwettige besetting wees ten einde ʼn stokkie daarvoor te steek. Hy is ook baie bekommerd daaroor dat die polisie glo bloot toegekyk het toe die georganiseerde kaping van dié maatskaplike behuisingskompleks plaasgevind het.

Plato het ʼn beroep op pres. Cyril Ramaphosa gedoen om die regulasies dringend te verander ter wille van die oppergesag van die reg, die algehele beswil van ons gemeenskappe en die ontwikkelingsdoelstellings van die land se stede.

Dié spesifieke eiendom is vir die eerste keer in Maart 2017 gekaap, ná die aankondiging van die regering se planne om die eiendomme in maatskaplike behuising te omskep. Toe het die geregtigheidsgroep Ndifuna Ukwazi ʼn georganiseerde kaping uitgevoer onder sy veldtog “Reclaim the City”.

“Die giftige nalatenskap van hierdie onwettige besettingsveldtog het ʼn groot struikelblok geword vir maatskaplike behuising op twee goed geleë terreine in Kaapstad.”

Volgens Plato was die styl van vorige georganiseerde kapings soortgelyk aan die jongste Communicare-voorval.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Baardman

Direkte gevolg van onteiening sonder vergoeding beleid. Zim 2 in die wording, tensy daar drasties opgetree word

Elsje

Dit gaan te lekker in SA, wetloos. Maak soos in Portugal en sloop die gebou.

Pierre

Ek kan werklik nie verstaan hoe die ramp toestand krimele aktiwiteit “wettig” nie.

Faraway

Dinge gaan al hoe meer word soos dit was in die dae van Noag . . . goddeloos!

Phillip

Se net weer dis hoe grond gryping sonder vergoeding gaan wees dis maar net n voor smaakie vir almal van ons