Polisie móét plaasaanvalstatistiek bekendmaak, beslis hof

Argieffoto

Argieffoto

Die hooggeregshof in Pretoria het Vrydag in AfriForum se guns beslis nadat die organisasie die Suid-Afrikaanse Polisiediens (SAPD) hof toe gesleep het oor hul weiering om die plaasaanvalstatistiek van 1990 tot 2015 bekend te maak.

Ernst Roets, adjunk uitvoerende hoof van AfriForum, het gesê die burgerregte-organisasie het in Mei 2015 ʼn formele versoek aan die voormalige nasionale polisiekommissaris, Riah Phiyega, gerig om die SAPD se volledige plaasmoordstatistiek vir die tydperk tussen 1990 en 2015 aan hulle bekend te maak.

Die aansoek is ingevolge die Wet op die Bevordering van Toegang tot Inligting gebring nadat die regering in 2007 bekend gemaak het geen verdere statistiek oor plaasmoorde sal ingesamel word nie. Phiyega het egter in Maart 2015 gesê die SAPD is nog al die tyd daarmee besig. Sy het beweer die syfers word om “operasionele redes” steeds bygehou, maar nie gepubliseer nie.

Regter Nicolene Janse van Nieuwenhuizen het Vrydag beslis die statistieke moet binne die volgende 30 dae aan AfriForum oorhandig word. Dit sluit die jaarlikse nasionale en provinsiale statistiek vir plaasmoorde en -aanvalle tussen 1990 en April 2015 in, asook die dokument waarin die metodologie vir die insameling  en verwerking van die data uiteengesit word.

“Ons beskou die uitspraak as ’n reusedeurbraak in die stryd teen plaasmoorde,” het Roets gesê. “Die polisie hou hierdie inligting by, maar weier sedert 2007 om dit aan die publiek bekend te maak. Uiteindelik gaan die publiek weet wat die polisie weet. Dit is egter tragies dat ’n mens tot in die hooggeregshof moes baklei om hierdie basiese inligting te bekom.”

Roets het bygevoeg die publikasie van dié statistiek is die eerste stap om plaasmoorde amptelik te prioritiseer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Anoniem

Wonder of hul die ware syfers bekend gaan maak…..GLO NIE……

NEL

Dit sal en kan nie die waresyfer wees nie want die mense wat die syfer moet bymekaarsit is nie geskool om dit te doen nie. Tweedens kan die polisie nie die syfer beken maak nie , aangesien hulle nie die inligting op hand het nie, is iewers op n ashoop uitgebrand Dit moet soos ‘n K.P.I lyk. Hoeveel plaasmoorde was daar , arrestasies is gedoen, hoeveel plaasmoorde is gefyk voordat dit gebeur het en die % afgehandelde sake in watter bestek van tyd, en laaste maar nie die minste die strawwe wat toe gedien is. Hopeloos om te se glo… Lees meer »

wilma

Hoekom nou eers na paar jaar

Jordaan

En nou gaan hulle appelleer en daarna grondwethof toe as hulle op appel ook verloor. Ons het mos gesien met die Khampepe verslag het dit 12 jaar gevat, die “spy tapes” ook ‘n paar jaar. Ek vra altyd waarom inligting weerhou as jy niks het om weg te steek nie?

Chris W

Wel gedaan AfriForum!Wie betaal nou jul regs kostes?Dit moet sekerlik verhaal word van die polisie af ??Ek meen HULLE het veroorsaak dat daar ‘n onnodige hofgeding was!Kap hulle!