Polisie neem vrou in hegtenis wat huiswerker wil verkla

Amanda de Goede (56) is Vrydag in hegtenis geneem toe sy haar huiswerker wou verkla. (Foto: Facebook)

ʼn Vrou van Deneysville is Vrydag in hegtenis geneem nadat sy die polisie na haar huis ontbied het om ʼn klag van diefstal teen haar huiswerker te ondersoek.

ʼn Hoogs ontstelde Amanda de Goede (56) het aan Maroela Media vertel sy is in die vangwa geboender, in ʼn sel geprop en ure later vrygelaat op voorwaarde dat sy met haar huiswerker vrede sal maak.

De Goede vertel sy het onraad vermoed toe haar twee werkers, ʼn broer en ʼn suster, Vrydag gereedgemaak het om vir die naweek huis toe te gaan.

“Ek het gesien die man sukkel om die tas toe te kry. Ek hom gevra waarom die tas so vol is as hulle net ʼn naweek huis toe gaan en hy het geantwoord dat dit sy suster se tas is.

“Toe ek daarop aandring dat hy die tas oopmaak, het ek ʼn klomp van my oorlede dogter, Nevilene (Pretorius), se besittings in die tas gesien.”

De Goede by haar oorlede dogter, Nevilene Pretorius. (Foto: Verskaf)

De Goede was uiters ontsteld en het die polisie na haar huis ontbied.

“Toe die polisie opdaag, het my huiswerker volgehou dat ek die goed al drie jaar terug vir haar ma, wat voorheen by my gewerk het, gegee het, hoewel my dogter nou eers twee jaar dood is.

“Ek het nog glad nie haar dood verwerk nie en is ook nie gereed om van haar besittings ontslae te raak nie.”

Pretorius is in 2019 aan breinkanker dood en het volgens De Goede 18 jaar lank in die polisiemag gewerk. Sy het in Klerksdorp gewoon.

“Ek was goed vir die Deneysville-polisiebeamptes. Ek het van my dogter se ou uniforms vir hulle geskenk en ʼn klomp maskers vir hulle gemaak,” sê sy huilend.

De Goede sê die huiswerker het verder aangevoer dat die geskil eintlik oor geld gaan, hoewel sy reeds betaal is en die geldsakkie by haar gehad het.

Sy verduidelik verder dat sy ʼn Zimbabwiese vriend van die werkers, wat ook op die perseel was, nadergeroep het om te beaam dat die argument inderdaad nie oor geld gehandel het nie.

“Die polisie het my gevra of hy ‘papiere’ het waarop ek geantwoord het dat ek nie weet nie. Sy het my toe in hegtenis geneem omdat ek glo ʼn ‘werker sonder papiere’ in my diens het.

“Ek het dit duidelik gemaak dat ek hom nie betaal nie, wat hy beaam het. My werker bring hom soms saam om hom in die tuin te help en ek gee vir hulle kos,” sê De Goede.

De Goede moes ʼn brief onderteken dat sy nooit weer teen haar huiswerker ʼn klag sal indien nie. Die polisie het glo ook gedreig om haar man, Neville, later dieselfde aand in hegtenis te kom neem.

Die werkers het nie Maandag na die gesin se huis teruggekeer nie.

De Goede sê sy is erg getraumatiseerd en te bang om ʼn saak teen die polisie aanhangig te maak.

Die polisie het nog nie op Maroela Media se navrae reageer nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

63 Kommentare

jongste oudste gewildste
Anton

En dit het seker niks te doen met dat sy wit was nie???

Persheks Adri

Gerrie Nel tree in asb!

Renier johannes

Korrupsie en rassisme in die ergste graad

Veronica

Moet dit beslis nie daar los nie dis verregaande en belaglik en hulle moet beslis nie met die wegkom nie , maar dit verbaas my eintlik glad nie so word ons vlerkies vir ons geknip deur die wat ons moet beskerm, so hulle steek ‘n blatante leunaar en dief in haar kwaad en maak jou as die villan uit en nou is altwee net weg ook nog, nee wat hoor doen jou ding en maak ‘n groot bohaai hieroor jy is ooglopend geintimideer en geboelie!

Hoekom

Nog ‘n bewys dat ons op ons eie is. Die rasse diskriminasie in hierdie land raak al hoe meer opvallend. Ons sal moet begin besef dat daar net een uitweg is…