Polisie ondersoek samekoms buite Mlangeni-huis

Die polisie gaan ondersoek instel na die beweerde oortreding van die afsonderingsregulasies deur roubeklaers wat by die huis van die ANC-struggleheld Andrew Mlangeni byeengekom het. Mlangeni is op 21 Julie in die ouderdom van 95 dood.

Mlangeni se liggaam het Dinsdag by sy huis in Soweto aangekom waarna daar Woensdag ʼn kategorie 1-staatsbegrafnis vir hom op die Soweto-kampus van die Universiteit van Johannesburg gehou is. Hy is daarna in die Roodeplaat-begraafplaas ter ruste gelê.

Volgens brig. Vishnu Naidoo, nasionale polisiewoordvoerder, het talle lede van die publiek versoek dat die roubeklaers wat buite Mlangeni se huis byeengekom het, in hegtenis geneem moet word vir die oortreding van die afsonderingsregulasies.

Foto’s wat van die byeenkoms versprei word, wys ʼn groot groep mense buite die huis wat nie sosiale distansiëring toepas nie. Dit blyk ook dat veel meer as 50 mense byeengekom het, wat strydig is met die regulasies rondom begrafnisse.

“Die regulasies ingevolge die Wet op Rampbestuur maak voorsiening daarvoor dat skares wat onwettig bymekaarkom uiteengejaag kan word en dat ʼn persoon of persone wat onwettige byeenkomste hou of reël aanspreeklik gehou kan word.”

Volgens Naidoo word daar dus ʼn saak rakende die oortreding van regulasies ondersoek. “Sodra die ondersoek afgehandel is, sal die saak na die direktoraat vir openbare vervolging verwys word om te besluit oor moontlike vervolging.”

Foto’s van Dinsdag se byeenkoms het soos ʼn veldbrand op sosiale media versprei. Mense het heftig daarop gereageer en gesê dat hulle nie die geleentheid gekry het om hul geliefdes op dié manier te groet nie.

Fikile Mbalula, minister van vervoer, is duidelik sigbaar in een van die foto’s. Pule Mabe, nasionale ANC-woordvoerder, het Woensdagmiddag in ʼn onderhoud met eNCA bevestig van die lede van die party se nasionale uitvoerende komitee het die verrigtinge by die huis bygewoon. Hy het egter gesê mense het “spontaan” in hul getalle opgedaag.

“Die ANC is nie verantwoordelik om mense te beheer waar hulle woon nie. Die ANC het uitdagings opgemerk, dit beteken dat ons vorentoe moet sê wat die lesse is.”

Intussen is drie lede van die land se veiligheidsmagte Woensdag op kamera vasgevang waar hulle staan en rook tydens die regstreekse uitsending van Mlangeni se begrafnis. ʼn Skermskoot hiervan is ook wyd op sosiale media versprei met mense wat wil weet of die afsonderingsregulasies net vir sommige Suid-Afrikaners geld.

ʼn Tabakverbod geld reeds sedert einde Maart vanjaar toe ʼn nasionale ramptoestand en landwye afsonderingstydperk aangekondig is in die stryd teen die Covid-19-pandemie. Bheki Cele, minister van polisie, is al herhaaldelik aangehaal dat hy gesê het dat indien mense gevang word waar hulle in die openbaar rook hulle ʼn strokie gaan moet wys om te bevestig dat die sigarette wettig voor die afsonderingstydperk gekoop is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

34 Kommentare

jongste oudste gewildste
Renee

Ai waar was Mnr Cele nou met sy ingehtenisnemimg hy kon die voorblad gehaal het met die hoeveelhede inhegtenisname wat hy kon gedoen het.

Pieter

Ag asb ons is al so moeg vir julle stories bly eerder stil.

Alleen Wolf

ANC is onaantasbaar, wat my verstand te bowe gaan is dat ons ou volkie so gedwee die verdrukking aanvaar

Fedup

Just goes to show who the real ” citizens” in this country are.
If we were all mushrooms, we could smoke, drink, party and visit family.
But unfortunately, we were not in the same baking tray when the lockdown was enforced by this circus.

Pieter

Some people are more equal than others – George Orwell