Polisie skiet man glo ná twis by gastehuis

Len Cloete is Saterdag deur polisie in die kop geskiet en is tans in ’n koma. (Foto: Facebook / Len Cloete)

’n Pretoriase man is tans in ʼn koma nadat hy Saterdagoggend glo deur die polisie by ʼn gastehuis in Muldersdrift, Gauteng, in die kop geskiet is.

ʼn Onderonsie met personeellede oor kamers wat glo nie gereed was nie, het na bewering aanleiding tot dié gebeure gegee. Die voorval het omstreeks 01:00 plaasgevind.

Len Cloete is ná die skietery na ʼn private hospitaal in Krugersdorp gehaas waar hy volgens inligting steeds in die intensiewe sorgeenheid behandel word.

Cloete se vrou, Chantal, was saam met hom toe die voorval plaasgevind het.

Sy het Saterdag op Facebook geskryf dat haar man “om sy lewe veg”.

“Veg my man. Ek kan jou nie verloor nie, nie so nie. Bid asseblief almal vir ’n wonderwerk.”

In nóg ’n inskrywing Maandag sê Chantal dat sy Cloete baie mis.

“Ek en al jou kiddies het jou nog so baie nodig. Ek het jou bitter lief, my beste maaitjie.”

Maroela Media kon haar nie Maandag vir kommentaar bereik nie.

Die private ondersoeker Mike Bolhuis hanteer tans die saak.

Volgens Cecil Benade, ʼn lid van Bolhuis se span wat die ondersoek lei, kan hy bevestig dat Cloete wel deur die polisie geskiet is.

Dit is egter nie in dié stadium duidelik of daar een of dalk twee skote was nie.

Benade sê die egpaar het Vrydag saam met nog ʼn paartjie by die gastehuis aangekom.

’n Argument het glo ontstaan omdat dié kamers nog nie gereed was nie, waarna die paartjies by ’n restaurant gaan eet het.

Die paartjies, sowel as die gastehuis se bestuur, het glo later die polisie ontbied, waarna Cloete geskiet is.

“Die ondersoek is tans nog in ’n sensitiewe stadium, en meer inligting sal later bekendgemaak word.”

Bolhuis sê hul ondersoek sal hoofsaaklik fokus op die protokol wat die polisie tydens die skietery gevolg het.

“Die polisie – soos met enige situasie waarby hulle toetree –  sou eerstens waarskuwings moes rig, tweedens ʼn vuurwapen te voorskyn moes bring en dan die wapen rig. Die vierde protokol is om ʼn skoot op die grond en dan ʼn skoot in die voet af te vuur.

“Laastens kan die polisie skiet as daar dreigende gevaar is. Dan skiet jy iemand verkieslik nie dood nie.”

Bolhuis beklemtoon ook dat wanneer die polisie tot enige situasie toetree, behoorlike kommunikasie uiters belangrik is. Hy sê kommunikasie is die eerste fase.

Afhangende van die aantal polisiebeamptes teenwoordig, sê Bolhuis, kan ʼn persoon ook met polisietaktieke oorrompel word – veral as die persoon nie gewapen is nie.

“Verder skiet jy ook nie meer skote as nodig nie.

“Die polisie is daar om te beskerm en te dien. Hulle is daar om ʼn situasie te ontlont.

“Wanneer hulle tot ʼn insident toetree moet hulle ʼn algehele evaluasie van die situasie doen, gevolg deur ʼn algehele identifikasie en algehele risiko-analisering. Hoe jy die situasie opsom bepaal die noodsaaklikheid van die gebruik van ʼn wapen – wat nie altyd gedoen word nie.”

Die span sal nou ondersoek na al hierdie aspekte instel om te bepaal watter protokolle die polisie wel gevolg het al dan nie.

Die onafhanklike polisieondersoekdirektoraat (Opod) dra nie kennis van die voorval nie.

 

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

108 Kommentare

jongste oudste gewildste
Jack

Nee wat die polisie wat deesdae die publiek moet beskerm het geen benul van protokol nie.Hulle kan nie vuurwapens hanteer of skiet nie.Eenvoudig gesproke.Die polisie het ‘n punt bereik waar almal doen wat hulle wil.As jy aan die verkeerde kant van sy wapen staan al is jy onskuldig is die kanse goed dat hy jou dalk gaan skiet.Jy kan nie op hulle reken nie,jy kan hulle nie vertrou nie en jy kan NOOIT jou lewe in hulle hande sit nie.

Agge nee

Gee asseblief die naam van die gastehuis? Ek wil nooit, ooit daar tuisgaan nie. As jy kla oor jou kamer nie gereed is nie, skiet die polisie jou in die kop. Goeie hemel!

JohanR

Het die SAP’s al gehoor van ‘n Tazer? As julle die man ge-Tazer het sou hy ‘n nag in die selle spandeer het, en dan in die hof verskyn het, maar hy sal nie ‘n koeel in die kop gekry het nie. Net te gou om die vuurwapen uit te haal.

Patch

Baie hartseer en onnodig! Maar ek wonder…Waarom is polisie ontbied oor ‘n onderonsie oor kamers wat nie gereed is nie? Was die gaste miskien buite beheer en daarom het die gastehuis personeel die polisie ontbied? Dit was 01h00. En waarom sou die gaste ook die polisie ontbied? Bietjie deurmekaar vir my. Maar dit gesê, hoop dat hy spoedig herstel en dat die skuldige polisiebeampte aan die pen sal ry.

RekmyBek

Shoh!!!!

Sal graag wil weet wat gastehuis se naam is.