Polisie skiet vyf ‘rowers’ dood

Argieffoto: SAPD / Facebook

Vyf mans is Sondag deur die polisie doodgeskiet kort ná ʼn rooftog by ʼn supermark in Estcourt in KwaZulu-Natal.

Maj. Robert Netshiunda, woordvoerder van die Valke, het Maandag gesê lede van die Valke, misdaadintelligensie-eenheid en die Durbanse honde-eenheid het hulle na die rooftoneel gehaas, toe hulle op een van die verdagtes se wegkommotors op die R103 naby Mooirivier afgekom het.

“Die beamptes het vir die bestuurder van ʼn Toyota Quantum met vier passasiers aangedui om stil te hou, maar hy het hom verset. Die swaargewapende insittendes het op die polisie losgebrand. Die motor het stilgehou, waarna die verdagtes te voet probeer vlug het, terwyl hulle steeds op die polisie geskiet en een beampte gewond het,” het Netshiunda gesê.

Die polisie het teruggeskiet en al vyf noodlottig gewond. Die verdagtes was tussen 28 en 55 jaar oud. Die beseerde beampte is na ʼn hospitaal geneem vir behandeling.

Die polisie het beslag gelê op vyf vuurwapens, waaronder ʼn AK47-aanvalsgeweer, ʼn R5-geweer en drie 9 mm-pistole, sowel as ammunisie. Die polisie het ook beslag gelê op verskeie bokse sigarette en lugtydkoepons wat vermoedelik by die supermark geroof is.

“Nóg ʼn voertuig wat by die rooftog betrokke was, en waarin twee verdagtes gery het, is later verlate naby Estcourt opgespoor. Daar word vermoed dat dié twee met ʼn onbekende bedrag kontant weggekom het. Die soektog na hulle duur voort,” het hy gesê.