ʼn 34-jarige man wat met ʼn kapingsindikaat tussen Gauteng en Mpumalanga verbind word, is Maandag in Duduza, ʼn nedersetting naby Nigel in die Oos-Rand, in hegtenis geneem.
Die man, wie se naam nie bekendgemaak is nie, is boonop met ʼn gesteelde voertuig in sy besit betrap. Dié voertuig is onlangs in Mpumalanga gekaap.
Sers. Harry Manaka, polisiewoordvoerder, sê lede van dié sindikaat kaap voertuie in die gebiede van Kinross, Kriel en Secunda, en los dan gewoonlik hul slagoffers iewers in Duduza agter.
Hy beskou die inhegtenisneming as ʼn “groot deurbraak” in die polisie se pogings om dié sindikaat vas te trek.
Manaka verduidelik dat die verdagte in die vroeë oggendure in hegtenis geneem is nadat die polisie weke lank ʼn eiendom in Thipestraat dopgehou het. Hy het ook twee vuurwapenmagasyne en ammunisie in sy besit gehad.
Hy sal eersdaags in die Nigel-landdroshof op aanklag van die besit van ʼn gekaapte voertuig en ammunisie verskyn. Dit is nie duidelik of hy steeds in aanhouding is of intussen op borgtog vrygelaat is nie.