Polisie soek dié man na bestuurder VS-gesin doodry

Die polisie is op soek na die eienaar van dié voertuig, met registrasienommer HBG 131 NW. (Foto: SAPD)

Daar is steeds geen spoor van die bakkiebestuurder wat ʼn pa, sy twee kinders en ʼn maatjie verlede maand langs ʼn pad tussen Allanridge en Odendaalsrus in die Vrystaat doodgery het nie.

Theuns Lubbe (39), sy vrou Elmarie (38), hulle kinders Amory (4) en Tristen (8) en ʼn maatjie Juliana Gomez (6) was op 29 Maart omstreeks middernag ná ʼn werksgeselligheid op pad huis toe, toe hulle motor omgeslaan het. Elmarie is in dié ongeluk dood. Theuns en die kinders het in die veld langs die pad gestaan, toe die bestuurder van ʼn wit Ford Ranger-bakkie in hulle ingeploeg het.

Die bestuurder het die bakkie op die toneel gelaat en klaarblyklik te voet gevlug.

Die polisie het gesê die voertuig behoort aan Zaleka Abide van Bloemfontein en het ʼn beroep op hom gedoen om na vore te kom om hulle met die ondersoek te help. Die polisie het ook gevra dat enigeen met inligting oor waar Abide hom moontlik bevind, konst. Matopile Madyongolo bel by 057 916 2431 of 082 502 4752.

Neels Lubbe, Theuns se neef, het gesê ʼn roudiens is die afgelope naweek vir die gesin gehou. Hulle word vandeesweek privaat veras.

“Dit is verskriklik, ek het hom (Theuns) elke liewe dag gebel. Ek mís hom. Ek mis dat hy vir my vra waarmee is ek besig. Hy was vir my soos ʼn eie seun.

Elmarie Lubbe (38) en haar kinders Tristen (8) en Amory (4). (Foto: Facebook)

“Maar ek het nou meer vrede. Ek weet hulle is minstens al vier bymekaar,” het Neels oor die gesin gesê.

Neels het gesê hy is egter kwaad vir die bestuurder van die bakkie, omdat dié van die toneel gevlug het. “Ek is baie kwaad, nie omdat die ongeluk gebeur het nie, hy (die bestuurder) kon dit nie voorsien het nie, maar dis nou al twee weke sedert hy weggehardloop het. In my oë is dit gewetenloos om nie na vore te kom nie,” het Neels gesê.

Hy het gesê hy kry baie goeie samewerking van die polisie, wat hulle bes doen om die bestuurder van die bakkie op te spoor. Hy kry ook gereeld terugvoer oor die ondersoek, het hy gesê.

Neels is ook steeds op soek na aanneemhuise vir die Lubbe-gesin se vier honde. As die diere nie binnekort nuwe eienaars kry nie, sal hy hulle moontlik van kant moet laat maak, het hy gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

40 Kommentare

jongste oudste gewildste
Gert van Wierdapark

Die Abide swernoot is dalk reeds land uit! Bied ‘n behoorlike beloning aan, en dit kan help om sy doppie te klink!

honourable member

Ek verstaan nie hoe ry jy mense dood en jaag dan net weg nie. Het die persoon absoluut geen gewete nie. As die polisie tog die nommerplaat het dan moet hulle hom mos kan opspoor of het hy dalk oor die grens gevlug. Nee hel dis n baie sad storie hierdie. Ek hoop regtig daardie arme diere kry goeie huise want dis nou absoluut onnodig om hulle net te laat uitsit.

Anonieme Lafaard

Gewone burgers moet deur so baie “hoops” spring met RICA / FICA / ens. – bewys van adres om elke hoek en draai voorlê, vingerafdrukke, kopië van jou ID ens. orals ingee. Tog lyk vir my hulle het nie eens ‘n woonadres, ID nommer, foto of enige ander bruikbare inligting om aan die publiek te wys behalwe ‘n foto van die voertuig en nommerplaat? Hoe dan nou?

o

Daar is ‘n plakker van ‘n Amerikaanse saalperd op die bakkie. Nie iets wat enigiemand op sy bakkie plak nie…

Nette

GEWETE…..O NEE VERGEET DAAR BESTAAN NIE SO IETS NIE!!!!!