Polisie soek dié man ná Levubu-plaasmoord

Walter Maringa. Foto: Verskaf deur SAPD

Die polisie is op soek na ʼn 33-jarige man wat vroeër in hegtenis geneem is in verband met die moord op Hennie Bonnema, ʼn boer wat in Oktober 2016 op sy plaas in die Levubu-omgewing in Limpopo vermoor is.

Lt.kol. Moatshe Ngoepe, woordvoerder van die polisie, het gesê Walter Maringa, wat kort ná die moord in hegtenis geneem is, het destyds saam met twee medebeskuldigdes in die Vuwani-landdroshof verskyn. Hy is toe op borgtog van R5 000 vrygelaat.

“Die verdagte het nie op 27 Desember 2017 in die hof verskyn soos hy moes nie en hy vlug sedertdien vir die polisie,” het Ngoepe gesê. Hy het gesê ʼn lasbrief vir Maringa se inhegtenisneming is uitgereik.

“Daar word vermoed dat hy in Zimbabwe wegkruip. Die verdagte kan moontlik verbind word met ander plaasmoorde in en om die Levubu-gebied.”

Enigiemand met inligting oor waar Maringa hom mag bevind, word versoek om kapt. Richard Boshomane by 079 894 5501 of Stop Misdaad by 08600 10111 te kontak. ʼn SMS kan ook gestuur word aan 32211.

Maroela Media het vroeër berig Bonnema (62) se seun en skoondogter het sy bebloede liggaam op 18 Oktober 2016 omstreeks 23:00 buite sy plaashuis gevind. Bonnema het die betrokke aand omstreeks 21:30 by die huis gekom nadat hy by familie gaan eet het.

Jan Bonnema, Hennie se broer, het destyds aan Maroela Media gesê Hennie het vermoedelik by die erf ingery, onraad vermoed en omgedraai om weer uit te ry, toe die aanvallers hom voor die hek oorval het. Hy is daar met ʼn skerp voorwerp gesteek en geslaan en is op die toneel dood.

Hennie het saam met sy seuns, Hendrik en Pieter, met avokado’s, piesangs en makadamianeute geboer.

Lees alle vorige berigte oor Hennie Bonnema op Maroela Media.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

37 Kommentare

jongste oudste gewildste
Kruks van die saak.

R5000 borg is soos beloning vir moord!

Moeg vir SA

Hoe word ñ moordenaar op borgtog van R5000 vrygelaat en wie het die borg so ewe betaal?Dan verskyn hy eers nege maande daarna weer in die hof??Natuurlik sal hy aangaan met die moorde en plaas aanvalle dis plain logika!!

Hennie

Sien dis waarvan ek praat. Word in hegtenis geneem vir moord maar word borgtog toe gestaan!!! Nerns in die wereld word borgtog toegstaan aan mense wat verdink word aan moord,roof of verkragting nie. So hoekom word dit in ons land toe gestaan? Wys net ons regstelsel is so opgestel dat dit die beskuldiges bystaan en help!!! Ons land moet begin bykom

Hoe?

Hoe op aarde kry jy dit in jou kop om ‘n moordverdagte op borgtog los te laat, veral as jy bewus is dat hy ‘n buitelander is!?

PJC

Hy word ook verdink van ander moorde so hy moes nooit borg gekry het nie. Hopelik raak hy mak en loop iewers sy rieme styf.