Polisiebeampte vas wat ‘borgtoggeld’ eis

ʼn Polisiesersant het Donderdag in die Kaapstad-landdroshof verskyn op ‘n aanklag van korrupsie nadat hy “borgtoggeld” by twee onskuldige mans geëis het.

Konst. Noloyiso Rwexana, woordvoerder van die polisie, het gesê die 32-jarige polisiebeampte het glo ’n saak ondersoek waarby twee verdagtes betrokke was. Daar was egter geen bewyse wat die twee mans aan die misdaad verbind het nie en hulle moes vrygelaat word sonder enige aanklagte teen hulle.

Die polisiebeampte het egter R4 000 by die verdagtes geëis wat volgens hom “geld vir borgtog” is.

Die SAPD se teenkorrupsie-eenheid het die sersant omstreeks 07:30 in hegtenis geneem en hy het dieselfde dag nog in die hof verskyn.