Polisiebeamptes help glo vragmotor kaap

Argieffoto ter illustrasie: SAPD

Twee polisielede, ʼn kaptein en ʼn konstabel, is onder die nege mans wat vroeg Maandag aan die Oos-Rand in verband met die kaping van ʼn vragmotor in Potchefstroom in hegtenis geneem is.

“Gauteng se polisiebestuur was teleurgesteld om te verneem dat die twee polisiebeamptes in volle uniform en in ʼn gemerkte polisievoertuig die vragmotor begelei het nadat dit na bewering gekaap is,” sê kapt. Mavela Masondo, Gautengse polisiewoordvoerder.

“Terselfdertyd is die bestuur verheug dat [vermeende] misdadigers in ons geledere geïdentifiseer en in hegtenis geneem is.”

Masondo vertel die polisie was in die vroeë oggendure op roetinepatrollie toe hulle sien hoedat ʼn vragmotor op die N12-snelweg in Benoni aan Gauteng se Oos-Rand begelei word deur drie voertuie, waaronder een van die polisie.

“Die polisie het die stoet fyn dopgehou,” sê Masondo, “en hulle later in Boksburg voorgekeer. Voorlopige ondersoek het aan die lig gebring dat die vragmotor vol kruideniersware in Potchefstroom in Noordwes gekaap is.”

Al nege verdagtes is in hegtenis geneem en word aangekla van onder meer vragmotorkaping, die besit van ʼn gekaapte voertuig, regsverydeling en die bestuur van ʼn voertuig sonder die eienaar se toestemming.

Masondo sê die nege kom na verwagting Woensdag voor in die Boksburgse landdroshof.