ʼn Polisiehond in die Noord-Kaap het sy swemvaardighede ingespan toe hy ʼn moordverdagte in ʼn rivier vasgetrek het. Dié het glo die polisie probeer ontduik deur in die rivier te spring en weg te swem.
Kapt. Sergio Kock, polisiewoordvoerder, sê die polisie was dae lank op soek na ʼn 31-jarige man wat na bewering sy vriendin se pa by sy huis in Hartswater doodgesteek het. Die moord het verlede Dinsdag 15:30 plaasgevind en die verdagte het op die vlug geslaan op pad na Pampierstad.
Hy is Donderdag 13:50 uiteindelik deur lede van die polisie opgespoor. In ʼn poging om lede van die honde-eenheid te ontduik het hy in die rivier gespring en begin wegswem.
“Konst. Ashley Kock het die polisiehond Sem in die water agter hom aangestuur. Sem het die verdagte sowat halfpad deur die rivier ingehaal en vasgetrek,” het Kock gesê.
Nadat Sem die beweerde moordenaar uit die water gesleep het, het lede van die honde-eenheid hom in hegtenis geneem.
Hy sal na verwagting binnekort in die Hartswater-landdroshof verskyn.
Genl.maj. Johan Bean, distrikskommissaris van die Frances Baard-munisipaliteit, het Sem bedank vir sy harde werk om die verdagte vas te trek.
Bean het ook die betrokke beamptes en gemeenskapslede bedank vir hul vinnige reaksie wat tot die inhegtenisneming van die verdagte gelei het.
Ek het nou lekker gelag en lekker gekry tot in my kleintoontjie. Mooi so. Kry vir jou, katvis. Misdadigers is banger vir ‘n hond as ‘n vuurwapen. Ha, ha, ha!!!!
Lekker stuk steak vir daardie oulike hond.
Sem jou YSTER!
Mooi my honne!
Mooi so jou oulike honde kind! Inderdaad slimmer as baie mense wat ek ken.
Inderdaad. Jy is n hero Sem, mooi so!
Swem misdadiger swem, misdadiger kan nie swem nie. Sem jou pragtige dier, jy is ‘n held.
vat so fluffie
Ek sit net en smile oor die berig. Mooi so Sem. Wys die blikskottel waar dawid die wortels of been begrawe het. Ek hou van sulke positiewe berigte wat diere en veral polisie honde aanbetref. Ek dink hulle doen baie meer as wat ons lede van die publiek van bewus is.
Miskien moet daar meer honde en minder mense in die polisiemag wees!