(Argieffoto: SA Polisie)
Die onafhanklike polisieondersoek-direktoraat (Opod) stel ondersoek in nadat ʼn polisiebeampte glo Woensdag ʼn pastoor en twee kerklidmate in Centane, Oos-Kaap, doodgeskiet het.
Die beampte sal na verwagting Maandag in die landdroshof op Centane verskyn.
Ndileka Cola, woordvoerder van Opod, sê die beampte, ʼn adjudant-offisier verbonde aan die polisie in Mthatha se BBP-beskermingseenheid, het glo ʼn ’n stuk grond by ʼn plaaslike hoofman – wat saam met hom in dieselfde kerk is – gehuur.
Die grond behoort oënskynlik aan die kerk en die gemeente het ʼn kerksaal op dieselfde stuk grond begin oprig.
“Die verdagte is na bewering na die kerk en het die pastoor gekonfronteer. Hy het glo die pastoor en nog ʼn lidmaat doodgeskiet en nog ʼn lidmaat gewond,” sê Cola.
“Die beampte is daarna glo na die hoofman se huis waar hy hom ook gekonfronteer en glo doodgeskiet het.”
Die beampte staan tereg op aanklag van moord en poging tot moord. Hy sal Maandag om borgtog aansoek doen. Die staat het reeds aangedui dat hy die aansoek gaan teenstaan.
Daar is beslag gelê op die beampte se vuurwapen en dit is vir ballistiese toetse gestuur.
Opod se ondersoek duur intussen voort.
Daasy man, die verdeling van gemeenskapsgrond sonder akte loop soos stroop! Bied jou nou aan so ‘n hoofman kry sy kloue op die gemiddelde woonbuurt.
Verbaas die optrede iemand?
Ja nee wat man as jy ontevrede is oor iets, skiet jou ontevredenheid weg, hoekom dan nou nie. Hy hoort nie eers ‘n vuurwapen in sy hand te hou nie.