Polisierekrute koud, honger in Noord-Kaap

(Foto bloot ter illustrasie: SA Polisie)

Meer as 2 000 polisierekrute word glo aan haglike en onmenslike toestande by ʼn opleidingsfasiliteit in Kimberley in die Noord-Kaap onderwerp.

Luidens klagtes wat by die burgerregtegroep Action Society en die polisievakbond Popcru aangemeld is, moes rekrute drie dae lank sonder kos klaarkom en moet hulle dun matrasse deel of op die vloer en op tafels slaap. Daar is glo ook nie warm water by die fasiliteit wat volgens Popcru soos ʼn “varkhok” lyk nie.

Daar is verder glo van vroue-instrukteurs verwag om slaapplek met mansinstrukteurs te deel.

“Die beskikbare verblyf is uiters beperk en lyk soos ’n varkhok. Daar is geen warm water nie, te min komberse, ’n tekort aan kos en stukkende toilette. Vroue-instrukteurs moet boonop verblyf met mansinstrukteurs deel,” sê Richard Mamabolo, woordvoerder van Popcru. Volgens Mamabolo het hulle ook klagtes ontvang dat instrukteurs in stoele of hul motors sit en slaap terwyl die rekrute aan hul eie lot oorgelaat is.

Die nuusblad Sowetan berig dat van die rekrute boonop glo voedselvergiftiging opgedoen het en geen mediese behandeling ontvang het nie. Hulle is ook glo deur ʼn junior beampte met ʼn vuurwapen gedreig.

Action Society het intussen ʼn brief aan lt.genl. Lineo Ntshiea, hoof van menslike hulpbronne by die polisie, en Fannie Masemola, nasionale polisiekommissaris, geskryf waarin dringende optrede versoek word. Hulle het egter nog geen terugvoer ontvang nie.

“Hierdie rekrute sal Suid-Afrikaanse burgers moet dien en beskerm, en tog word hulle self aan onmenslike behandeling en disrespek onderwerp,” het Ian Cameron, direkteur van gemeenskapsveiligheid by Action Society, gesê.

Volgens Cameron se inligting het geen amptelike opleiding al plaasgevind nie. Ouers wat die situasie by Actoin Society aangemeld het, is glo bang om self klagtes by die polisie in die te dien uit vrees dat hul kinders geviktimiseer sal word.

“Die behandeling van hierdie polisierekrute reflekteer uiters negatief op die topleierskap binne die Suid-Afrikaanse Polisiediens (SAPD) en sal beslis nie ’n positiewe uitkoms hê wat die versterking van die polisie se reputasie betref nie.

“Bheki Cele, polisieminister, se verbintenis om die plaag van geslagsgebaseerde geweld in Suid-Afrika te beveg, blyk weereens lippediens te wees aangesien die polisie nie eers voldoende voorsiening vir die opleiding van hul eie rekrute kan maak nie.”

Mamabolo sê die vakbond het ’n beroep op Cele en Masemola gedoen om die fasiliteit onmiddellik te besoek.

Daar is ook versoek dat rekrute dadelik na geskikte fasiliteite geskuif en van komberse en skoon verblyf voorsien word. Popcru vra ook ʼn ondersoek na die polisie se werwingsproses en eis dat hulle aanspreeklik gehou word vir die haglike omstandighede waaraan rekrute blootgestel is.

Mamabolo sê die vakbond het hom lank vir die werwing van nuwe polisielede beywer om veiligheid in die land te bevorder.

Hulle sou egter nooit kon raai dat die bykans 3 000 rekrute wat by die militêre basis in die Noord-Kaap geplaas is aan sulke omstandighede blootgestel sou word nie. Hy meen instrukteurs het juis ʼn verantwoordelikheid om te verseker dat die opleidingsprogramme gehalte polisiebeamptes oplewer.

Popcru werk glo reeds sedert 1 April om die probleme wat by dié basis ondervind is op te los.

“Ons het met die SAPD geskakel en die versoeke van die rekrute sowel as instrukteurs benadruk. Dit het egter op dowe ore geval. Ons as vakbond glo dat geen opleiding onder dié omstandighede kan plaasvind nie. Onder hierdie omstandighede loop rekrute én instrukteurs die risiko om siek te word of selfs te sterf indien iets drasties nie deur die polisie gedoen word nie. Hulle het egter tot dusver gewys dat hulle ongewillig is en nie in staat is om in te gryp in die voorsiening vir die mees basiese menslike behoeftes nie.”