Polisievrou vas ná sy wapen ‘uitverhuur’

Argieffoto ter illustrasie: SAPD

ʼn Polisiekonstabel van Bloemfontein in die Vrystaat is tydens ʼn spesiale operasie in hegtenis geneem nadat sy glo haar dienspistool aan misdadigers wou verskaf om ʼn rooftog te pleeg.

Die 34-jarige polisiebeampte sal na verwagting vandag in die Bloemfontein-landdroshof verskyn op aanklag van korrupsie, sameswering om ʼn gewapende rooftog te pleeg en diefstal.

Volgens AO Lynda Steyn, woordvoerder van die Valke, het die inhegtenisneming van die beampte, wat aan die stad se BBP-eenheid verbonde is, gevolg nadat inligting ontvang is dat sy glo beplan het om vuurwapens van haar eie eenheid te laat steel.

Lede van die Valke en misdaadintelligensie het hierna ʼn lokval vir die beampte gestel. Twee beamptes het hulle as misdadigers voorgedoen en die betrokke beampte ontmoet om die “rooftog” by haar eenheid te beplan. “Die beampte het hierna haar 9 mm-dienspistool aan die ‘misdadigers’ oorhandig.”

Die twee beamptes wat hulle as misdadigers voorgedoen het, is hierna na die BBP-eenheid in die stad waar hulle vuurwapens gaan leen het om as hul buit voor te hou vir wanneer hulle weer met die beampte sou byeenkom.

Die ontmoeting het omstreeks 22:00 by ʼn vulstasie in Bloemfontein plaasgevind en die “misdadigers” het vir die beampte hul buit, wat onder meer twee R5-aanvalsgewere en ʼn klomp ammunisie ingesluit het, gewys. Sy is hierna R30 000 vir die gebruik van haar vuurwapen betaal.

Die beampte is in hegtenis geneem nadat sy die geld aanvaar en in besit geneem het. “Daar is op haar dienspistool, motor en selfoon beslag gelê.”

Genl.maj. Kubandran Moodley, provinsiale hoof van die Valke, het beamptes geloof vir hul vinnige optrede nadat die inligting ontvang is.

“Dit kon tot ʼn katastrofiese situasie en lewensverlies gelei het as die rooftog sou plaasvind.” Hy het ook sy kommer uitgespreek oor hierdie soort misdade in die polisie.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

33 Kommentare

jongste oudste gewildste
Anoniem

S k i t t e r e n d !!!

MJ

Integriteit is laaaankal by die venster uit. Hoeveel ander wie hulself in hierdie posisie bevind, word nie uitgevang nie?

Sophia

Ek slaan my hande saam… Sal korrupsie OOIT uitgeroei kan word?

Suzette Geringer

Hulle kry dit wraggies reg om elke keer ‘n stap verder te gaan…. net as jy gedink nou het jy als gehoor….

Magda

UITSTEKENDE WERK – DANKIE