Polokwane se munisipale bestuurder geskors

Die munisipale bestuurder van Polokwane in Limpopo is geskors hangende ʼn ondersoek na onbekende bewerings.

Tidimalo Chuene, woordvoerder van die Polokwane-munisipaliteit, het gesê Constance Mametja is voorlopig vir 90 dae geskors. Die besluit is op 15 Mei tydens ʼn spesiale sitting van die raad geneem.

“Die bewerings teen die munisipale bestuurder kan nie in dié stadium bekend gemaak word nie aangesien dit sekere dele van die ondersoek in gedrang kan bring,” het Chuene gesê.

Volgens Chuene sal ʼn onafhanklike span aangestel word om ʼn ondersoek te doen en ʼn verslag aan die munisipaliteit se raad voor te lê.

Ndavhe Ramakuela, direkteur van gemeenskapsontwikkeling, is as waarnemende munisipale bestuurder aangestel.

News24