Poppie-verhoor: Só tug stiefpa kinders

Poppie van der Merwe (Foto: Facebook)

“Ek het hulle eers met die plat hand pak slae gegee, maar hulle het vir my gelag en dit het my kwaad gemaak. Dit is toe dat ek die paplepel gekoop het.”

Só het Kobus Koekemoer (44) Dinsdag in die hooggeregshof in Pretoria getuig waar hy saam met sy vrou, Louisa (46), teregstaan op ʼn aanklag van moord op Poppie van der Merwe (3), twee aanklagte van aanranding met die doel om ernstig te beseer en ʼn aanklag van kindermishandeling. Van dié aanklagte hou verband met die beweerde aanranding van ʼn sesjarige seuntjie en ʼn 16-jarige meisie tussen September 2015 en Oktober 2016.

Kobus het Dinsdag onder kruisverhoor getuig hy het aanvanklik die dissipline in die huis toegepas omdat hy die “vaderfiguur” was nadat hy en Louisa op 14 November 2015 in Orania in die Noord-Kaap getrou het.

Kobus het gesê hy het ʼn hegter band met die seuntjie gehad en dat Louisa en die tienermeisie meestal by Poppie betrokke was. Die tienermeisie het voor die troue saam met Louisa gewoon en gehelp om na die kinders om te sien. Sy het egter nie met Kobus oor die weg gekom nie en die huis verlaat toe die egpaar getrou het.

Hy het erken hy het die kinders baie geslaan “omdat hulle stout was” soos wanneer hulle goed gebreek of met hulle kos gespeel het. Hy sou hulle op die boude, op die hande en “soms op die bobene” met sy plathand geslaan het.

Kobus het getuig die kinders het egter vir hom gelag as hy hulle met die plathand bygekom het en hy het daarom ʼn paplepel by ʼn padstalletjie gekoop. Die paplepel, wat vroeër by die hof as ʼn bewysstuk ingedien is, is so groot soos ʼn volwasse man se voorarm en die punt so groot soos ʼn plathand. Hy het getuig hy het nooit die tienermeisie gedissiplineer nie en het dit van die staanspoor af in Louisa se hande gelaat.

Kobus het erken dat hy verskeie kere op die twee jonger kinders geskree en selfs gevloek het, soos ʼn voormalige buurman verlede week in die hof getuig het.

Kobus Koekemoer in die hof (7 November 2017). Foto: Phillip Bruwer

Hy het egter gesê die buurman se weergawe van die dag wat hy glo die kinders in die middel van die winter “sopnat gespuit” en buite in die koue laat sit het, is onwaar. “Ons het net gespeel. Hulle was nie sopnat gespuit nie, net ʼn bietjie. Ek en Louisa het saamgespeel en was ook nat,” het hy gesê.

Kobus voer aan hy het merke op die kinders opgemerk, maar dat hulle dit by die dagskool opgedoen het en wanneer hulle speletjies in die bakkie sou speel. “Hulle het gespeel as ons in die bakkie gery het en mekaar daarin rondgestamp.”

Hy het gesê hy het die beserings by die Orania Maatskaplike Raad (OMR) aangemeld, maar hulle het niks daaraan gedoen nie. Hy is van mening die OMR het ʼn sameswering teen hom en Louisa gehad en die buurman en die kinders se ouma was deel daarvan. Hy beweer hy het die dissipline gestaak en aan Louisa oorgelaat nadat die OMR hom aangespreek het.

“Meneer, beskryf jouself aan die hof. Beskou jy jouself as aggressief?” het adv. Adrian Nell, Louisa se regverteenwoordiger, aan Kobus gevra. “Ek is baie streng, nie noodwendig aggressief nie. As ek in ʼn woordewisseling betrokke is met iemand wat my beledig, dan sal ek aggressief raak.”

Hy het daarna erken dat hy al “in ʼn vuisgeveg of twee” met volwasse mense betrokke was. Hy het onder meer in ʼn stadium sy broer se kakebeen gebreek.

“Het u ooit vir Louisa aangerand?” het Nell gevra. “Nog nooit nie en ek het haar nog nooit gestamp nie. Ons het soms gestry en dan sou daar dalk ʼn vloekwoord van my en haar kant af gewees het.”

Nell het dit gestel dat Kobus vir Louisa “dramaties gevloek en geskel het” en dat sy bang was vir hom. Kobus het hierop geantwoord: “Ek is baie lief vir Louisa, meneer. Nee, ek het nie.”

Louisa Koekemoer in die hof. Foto: Phillip Bruwer

Nell het gesê Louisa sal ook getuig dat Kobus in Orania die kinders ernstig aangerand het. “Sy sal getuig sodra sy tussenbeide wou tree as jy die kinders aanrand, het die aanranding erger geword, want jy het berserk geraak.”

“Dis nie die waarheid nie,” het Kobus gereageer. “Louisa het haar deel van die pak slae uitgedeel. Louisa het ook ernstig pak slae uitgedeel, verskeie kere. As sy die kinders op hul boude of hande geslaan het, was dit reg, maar as sy hulle in die gesig of teen die kop slaan, het ek met haar daaroor gepraat.”

Die hof het gehoor drie dae voor Poppie op 25 Oktober 2015 in die Brits- provinsiale hospitaal dood verklaar is weens ʼn erge hou teen haar kop en bloeding op haar brein, was Poppie na bewering “amper dood”.

“Sy het net opgehou asemhaal. Ek het haar geskud, CPR gedoen en haar oë het weer oopgegaan,” het Kobus aan die hof gesê. Hy het gesê Poppie het “vanself reggekom” en die egpaar het nie gedink dit was nodig om haar na ʼn hospitaal te neem nie.

“Ek stel dit aan u dat u nie vir Poppie na ʼn hospitaal geneem het nie omdat julle geweet het die dokters sou al die merke aan Poppie sien,” het adv. Salomé Scheepers, staatsaanklaer, tydens kruisondervraging gesê.

Kobus beweer Louisa het Poppie die dag van haar dood “erg gedissiplineer”. Die hof het gehoor die egpaar was besig om Poppie te leer om die toilet te gebruik en dat sy die betrokke oggend haar bed vuilgemaak het. Louisa het haar skoongemaak en weer skoon klere laat aantrek, waarna Poppie as straf haar pap in haar kamer moes eet. Toe sy klaar geëet het, het sy weer haar bed vuilgemaak.

“Louisa was woedend. Ek het ʼn lawaai gehoor en dis toe dat ek sien Poppie kom hande-viervoet uit die kamer gevlieg, asof sy gestamp is. Sy het [vir Poppie] rof behandel en ʼn paar houe in die proses gegee. Sy het Poppie ook in die bad laat val en Poppie het haar kop gestamp. Ek het niks gesê nie, want ek wou nie inmeng nie.”

Scheepers wou weet hoekom Kobus juis so ʼn groot paplepel aangeskaf het om die kinders te slaan. “Glo u dat so ʼn klein meisie soos Poppie met so ʼn groot lepel pak moes kry?”

“Ek het hulle nie hard pak slae gegee nie. Die lepel was meer om ʼn geraas te maak,” het hy geantwoord. Scheepers het dit gestel dat Kobus die kinders geslaan het met die doel om hulle seer te maak en nie skrik te maak nie.

Sy het ook Kobus se weergawe dat die kinders seergekry het terwyl hulle speletjies in die bakkie gespeel het, in twyfel getrek. “As kinders speel, sal hulle lag. As hulle seerkry, sal hulle huil en die speletjies staak en nie sulke erge beserings opdoen nie,” het Scheepers gestel.

Kobus en Louisa Koekemoer in die hof (7 November 2017). Foto: Phillip Bruwer

“Hulle is taai kinders. Hulle huil nie sommer nie. Jy ken nie vir Poppie-hulle nie,” was Kobus se verweer.

“Maar dis omdat hulle te bang was om te huil en nie mag gehuil het nie. Almal wat tot duver getuig het, het gesê die kinders het hulle onttrek en soos bliksoldaatjies geraak as julle in die omtrek sou kom,” het Scheepers bygevoeg.

Kobus het geen emosie gewys terwyl hy deur foto’s van beserings aan Poppie se liggaam geblaai het nie. Hy het die merke uitgewys wat hy moontlik kon veroorsaak het deur haar “wakker te skud” en toe hy “CPR” gedoen het, maar vinnig uitgewys vir watter merke hy nie verantwoordelik was nie en glo ook onbewus van was.

Scheepers het gesê Poppie is weer in Brits aangerand, nadat dit aanvanklik beter gegaan het toe die OMR die huishouding begin monitor het. “Die OMR is was nie meer daar toe julle in Brits begin woon het nie en dit is hoekom Poppie nou dood is,” het sy dit gestel.

Die hof het daarna vir die dag verdaag. Kobus se kruisondervraging duur Woensdag voort, waarna Louisa na verwagting opgeroep gaan word om te getuig.

Lees alle vorige berigte oor Poppie van der Merwe op Maroela Media.