Porno op skoonmaak-DVD skok

'n Foto van die DVD's wat op sosiale media gedeel is. Foto: Facebook

‘n Foto van die DVD’s wat op sosiale media gedeel is. Foto: Facebook

ʼn Pa van Johannesburg is “gewalg” nadat sy peuterdogter en haar maatjies aan “ernstige pornografie” blootgestel is nadat hy ʼn DVD by ʼn Crazy Store-winkel gekoop het.

Wayne Nunn het aan Maroela Media gesê ses van sy dogter se maatjies het op 19 Augustus by hul huis gekuier. Die kinders wou graag ʼn DVD kyk, maar die DVD-speler moes skoongemaak word.

“Ek het ʼn lensskoonmaker-DVD by die Crazy Store in Randparkrif gaan koop. Toe ek by die huis kom, het ek die DVD solank in die DVD-speler gesit terwyl ek die res van die inkopies uit die bakkie gaan haal het. Toe ek terugkom, was ek geskok en gewalg om pornografiese beeldmateriaal op die televisie te sien,” het Nunn gesê.

Hy het gesê die kinders, tussen die ouderdomme van 17 maande en vyf jaar, het ook die pornografiese video gesien voordat hy dit kon afskakel.

Volgens Nunn het hy dadelik Crazy Store se kliëntedienslyn geskakel en hulle van die voorval verwittig. “Die vrou wat die klagte telefonies hanteer het, het aan my gesê om onder geen omstandighede die DVD aan enigiemand te oorhandig nie,” het hy gesê.

Die volgende dag is Nunn na ʼn ander nabygeleë Crazy Store, waar hy weer ʼn lensskoonmaker-DVD van dieselfde handelsmerk gekoop het. Volgens hom het hy die DVD by die huis gespeel en was daar “nog erger” pornografiese materiaal op.

“Ek was dadelik op die foon met Crazy Store se streeksbestuurder,” het Nunn gesê. “Hy het die middag na my huis toe gekom om na die DVD’s te kyk. Hy het foto’s van die betaalstrokies geneem, van die twee DVD’s en die pornografiese materiaal op die skerm. Hy het gevra of hy die DVD’s kan saamneem, maar ek het geweier en gesê ek sal nie die DVD’s oorhandig voordat ek nie weet dat hierdie saak nie net onder die mat ingevee gaan word nie.”

Volgens Nunn het hy dieselfde aand ʼn brief van ʼn prokureur, wat namens Crazy Store optree, ontvang dat die maatskappy regstappe sou neem indien Nunn die inligting op sosiale media deel of met enige media daaroor praat. Hy sê hy het later nog ʼn brief ontvang van nog ʼn prokureur, wat namens Crazy Store optree, waarin hy weer gewaarsku word om nie met die media te praat nie.

“Ek het my net nie aan die briewe gesteur nie. Ek weet wat my grondwetlike regte is en ek sal nie die saak hier laat voordat hulle nie die probleem op ʼn aanvaarbare wyse opgelos het nie,” het Nunn gesê.

Volgens Nunn eis hy dat die lensskoonmaker-DVD landwyd van Crazy Store se rakke onttrek word en dat die winkel hom en die publiek amptelik om verskoning vra vir die voorval. “As ʼn pa kan ek nie net hieroor stilbly nie. Ander ouers moet hiervan weet, veral aangesien dit ʼn gesinswinkel is,” het hy gesê.

Kevin Lennett, besturende direkteur van Crazy Store, het aan Maroela Media gesê hulle het binne tien minute nadat Nunn die kliëntedienslyn geskakel het, met hom in verbinding getree om ondersoek in te stel.

Lennett ontken ʼn Crazy Store-werknemer het gesê Nunn moet nie die DVD’s aan iemand oorhandig nie en sê volgens die transkripsie van Nunn se oproep aan die kliëntedienslyn, is hy gevra om die DVD’s te hou totdat ʼn verteenwoordiger van Crazy Store dit by hom kan kry.

“Die streekbestuurder was die volgende dag self by sy huis en het bevestig daar was wel pornografiese materiaal op die twee DVD’s,” het Lennett gesê. “Ons het Saterdag, ʼn dag nadat ons die klagte ontvang het, ʼn kennisgewing aan al ons winkels landwyd uitgestuur en die produk van ons rakke onttrek.”

Hy het gesê die maatskappy het met verdere ondersoek agter die kap van die byl gekom oor hoe die pornografiese materiaal op die DVD beland het. “Blykbaar gebruik die maatskappy wat die DVD’s maak, ou DVD’s wat hulle omskakel in skoonmaak-DVD’s. Soos ek verstaan speel die ‘skoonmaak-gedeelte’ van die DVD tot op ʼn sekere punt en dan wys wat ook al voorheen op die DVD was. Nadat ons van die voorraad by ons hoofkantoor en in ons stoorkamers nagegaan het, het ons gesien sommige DVD’s bevat godsdienstige inhoud, ander het musiekvideo’s op, ensovoorts. Ongelukkig bevat sommige ook pornografiese materiaal. Nodeloos om te sê, ons sal nooit weer die produk gebruik nie.”

Lennett het ook bevestig Crazy Store het wel regsbriewe aan Nunn gestuur. “Mnr. Nunn se weergawe van gebeure laat ʼn paar belangrike feite uit. Tydens ʼn gesprek tussen my en [Nunn] op Maandag, 22 Augustus, het hy gesê ʼn kliënt van hom het ʼn groot kontrak gekanselleer nadat sy dogter die video gesien het. Hy het geëis ons moet daarom aan hom vergoeding van R280 000 betaal. Hy het gesê indien ons dit nie doen nie, sal hy met die storie media toe gaan,” het Lennett gesê.

“Ek het hierdie feite aan ons prokureur oorgedra, wat daarna ʼn brief aan Mnr. Nunn gestuur het waarin hy beklemtoon dit kom op afpersing neer. Die eerste brief was van ons interne regspan en die tweede van ons prokureur.”

Lennett het gesê hy is steeds baie spyt oor wat gebeur het en beskou die voorval in ʼn baie ernstige lig. “Daarom het ons alles in ons vermoë gedoen om die saak so gou as moontlik reg te stel. Ons is ‘n trotse en betroubare onderneming wat nooit willens en wetens ons kliënte sou blootstel aan hierdie soort materiaal nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

42 Kommentare

jongste oudste gewildste
m

Interessant!!!??

Anoniem

Die gesinstydskrif “Huisgenoot”, is net so erg. Kan nie dink hoe kan die redakteur die foto’ s van vroue in eina bikini’s of deurtrekkers toelaat nie. Nog erger is die artikels oor gay-wees ens! Kinders lees die tydskrif, sies vir jul!

Piet Pompies

Met die verpakking van die produk sou geen mens kon dink dat dit gebruikte DVD’s is wat omskep is in skoonmaak DVD’s. Goedkoop vervaardig, duur prys om te betaal.

Johan

By watse crazy store en watse maak? ;-)

koos

Ek sit ook die lig af as ek my nagklere aan trek dan blaai ek deur die huisgenoot en sit weerdie lig aan lol.