Pravin Gordhan afgedank

Pravin Gordhan (22 Februarie 2017) Foto: GCIS

Pres. Jacob Zuma het Donderdagaand Pravin Gordhan, minister van finansies, die trekpas gegee.

Zuma het laataand ʼn onverwagse vergadering met die ANC se topses leiers in Pretoria gehou waartydens die kabinetskommeling na bewering bespreek is. Verskeie bronne het bevestig dat Gordhan afgedank is, maar die presidensie het dit nog nie amptelik bevestig nie. Dit is nog nie duidelik wie almal deur die kabinetskommeling geraak word nie. Die presidensie het wel bevestig ‘n mediaverklaring in die verband sal nog Donderdagaand uitgereik word.

Daar word al lank bespiegel dat Zuma beplan om Gordhan af te dank, veral nadat Zuma Gordhan en sy adjunk, Mcebisi Jonas, Maandag beveel het om onmiddellik van Londen na Suid-Afrika terug te keer. Gordhan en Jonas was saam met ander amptenare van die Tesourie in Londen, waar hulle ʼn internasionale beleggerspromosietoer bygewoon het.

Die presidensie het Maandag in ʼn verklaring bevestig dat Gordhan en Jonas opdrag gegee is om na Suid-Afrika terug te keer, maar wou nie redes vir die besluit verskaf nie.

Dawie Roodt, hoofekonoom van die Efficient Group, het gesê Gordhan se opvolger het groot skoene om te vul. “Hoewel staatsuitgawes onder Gordhan se toesig heeltemal handuit geruk het, is Gordhan tegnies baie vaardig. Hy is ʼn besonderse sterk leier en bo alles, is hy ʼn politikus met inbors,” het Roodt gesê.

“Hy was ook beskou as die laaste linie van verdediging teen die Zuma-patronaat. Sy opvolger het groot skoene om te vul en dit sal lank neem om die markte se volle vertroue te wen.”

Gordhan is as minister van finansies aangestel kort na die sogenaamde ‘Nenegate’-sage in Desember 2015, toe Zuma Nhlanhla Nene onverwags uit sy posisie as minister van finansies verwyder het. Nene is deur Des van Rooyen vervang, wat vier dae later ook in die pad gesteek is en deur Gordhan vervang is. Die ommeswaai in die tesourie het die land na raming byna R500 miljard gekos en die rand het getuimel tot meer as R15 teen die Amerikaanse dollar.

Gordhan se begrotingsrede in Februarie het oorwegend positiewe reaksie in ekonomiese kringe ontlok. In dieselfde week het Brian Molefe, omstrede voormalige uitvoerende hoof van Eskom, sy sitplek in die parlement ingeneem. Dit het wye bespiegeling ontlok dat Molefe een van die poste in die departement van finansies kan inneem, sou Zuma binnekort die kabinet skommel.

Gordhan se termyn as minister van finansies is gekenmerk deur politieke druk, soos ʼn onsuksesvolle poging verlede jaar om hom van bedrog te beskuldig.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

75 Kommentare

jongste oudste gewildste
Danue

Eerlik Zuma moet eerder loop…

Vincent

Here help ons.

Tim

Ave Ceasar, Mori Turi Et Salutimus.

Die Zulu’s is nou in beheer en in beheer gaan hulle bly.

Dis maar entlik waaroor dit gaan.

Nie dat ek omgee nie want ek sal bly tot die bitter einde toe al vrek my kinders en familie van siekte, hongersnood en onbeskryflike marteling en geweld.

Fudge

Ons land het begin brand… nou bly ons op ons knieë voor ons Skepper!!!

Jo

Boggom boggom. Hier is Zuma Mugabe die tweede. Hy sal eerder die hele land saam met hom sink viir hy padgee. Regte satanskind. Hy het net ‘n erge tekort aan lood in sy dieet. Ek laai maar eder patrone.