Premiers geloof wat plaasaanvalle wil prioritiseer

Argieffoto: Lorraine Claasen

Die burgerregteorganisasie AfriForum verwelkom Job Mokgoro, premier van Noordwes, en David Makhura, premier van Gauteng, se erkenning van plaasaanvalle en -moorde as prioriteitsmisdade.

Makhura het tydens sy provinsiale openingsrede erkenning gegee aan die erns van plaasaanvalle en -moorde en dit as prioriteitsmisdade gelys. Volgens Makhura sal ’n spesialiseenheid getaak word met die bekamping van plaasaanvalle en -moorde. Mokgoro het ook aangedui dat hy meer gereeld met die Suid-Afrikaanse Polisiediens (SAPD) en wetstoepassingsowerhede sal skakel om boere en inwoners van die platteland se veiligheid te verseker.

Gauteng is met 69 aanvalle vanjaar die provinsie met die hoogste getal plaasaanvalle in die land, terwyl Noordwes met 32 aanvalle ook luidens AfriForum se statistiek swaar geraak word. Albei provinsies het vanjaar vier plaasmoorde aangeteken.

Ivan Meyer, Wes-Kaapse minister van landbou, het al vroeër vanjaar ná die moord op Stefan Smit, beloof om stappe te doen om boere te beskerm. Dit sluit in die stigting van spesialiseenhede in landelike gebiede, druk op die Nasionale Vervolgingsgesag (NVG) om te verseker dat hulle plaasmoorde as prioriteitsmisdade verklaar en die teenstaan van borgtog vir beskuldigdes van plaasaanvalle.

“Dit blyk of die volgehoue druk en bewusmaking deur organisasies soos AfriForum met betrekking tot plaasaanvalle ten einde laas vrugte afwerp, en dat die owerhede stelselmatig tot die besef kom dat plaasaanvalle nie net as ’n gewone misdaad beskou kan word nie,” sê Hillel Coetzer, AfriForum se veiligheidshoof vir die noordstreek.

“Dit is prysenswaardig dat die premiers en provinsiale ministers plaasmoorde as ’n prioriteitsmisdaad beskou terwyl president Cyril Ramaphosa steeds daaroor swyg en selfs op internasionale platforms ontken dat plaasmoorde ’n ernstige krisis in Suid-Afrika is,” voeg Joseph Renaud, AfriForum se veiligheidshoof vir die sentraalstreek, by.

Renaud beklemtoon die noodsaaklike rol wat burgerlike instellings soos AfriForum moet speel om veiligheidstrukture vir boere en gemeenskappe te vestig om hul eie veiligheid te verseker en weerbaarheid binne die raamwerk van die wet te bevorder.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

27 Kommentare

jongste oudste gewildste
HAB

Snaaks dat hulle dit nou erken.
Nadat Nederland dit VN toe wil vat.

Marius

Julle raak vernuut bly. Baie regeringsamptenare word “getaak” vir verskeie doelwitte, en niks gebeur nie. Dis net ‘n foefie….

Sarel

Net Verkiesingsfoeffie en Politieke spel. Hulle sal nooit met opset en doelgerig teen die ANC of die Parlement praat nie.

Landvaneensydigheid

Monde wat praat maar die stilte is oorweldig…

Dries du Toit

Wes kaapse minister van landbou. Bestaan daar n minister van landbou vir elke provinsie. Kom nou MM maak reg