Presidensie kap terug oor Gordhan-berig

Pres. Jacob Zuma by die G20-beraad in China. Foto: Elmond Jiyane/GCIS

Pres. Jacob Zuma by die G20-beraad in China. Foto: Elmond Jiyane/GCIS

Die Presidensie het Sondag uitgevaar teen die “wanvoorstelling en manipulering van inligting” in ‘n mediaberig rakende pres. Jacob Zuma en Pravin Gordhan, die minister van finansies, se reis na China om die G20-beraad by te woon.

Bongani Ngqulunga, woordvoerder van die presidensie, het in ʼn verklaring spesifiek verwys na ʼn berig wat Sondag in City Press verskyn het, getiteld “Separate planes to China for Zuma and Pravin”. Hierin word berig dat betroubare bronne bevestig het dat Zuma en sy gevolg op ʼn privaat straler na Hangzhou in China gereis het, terwyl Gordhan verkies het om kommersieel te vlieg en sy eie program tydens die besoek te bepaal.

“Die joernalis wek die indruk dat iets skort of dat iets onregverdigs gebeur en dat die president en minister Gordhan eintlik in dieselfde vliegtuig na China moes gereis het,” het Ngqulunga gesê. “Dit blyk dat die berig ten doel het om die indruk te wek dat minister Gordhan sleg behandel is. Daar word niks genoem van die ander ministers en adjunkministers wat ook kommersieel na China gevlieg het nie.”

Ngqulunga het beklemtoon Maite Nkoana-Mashabane, die minister van internasionale betrekkinge en samewerking, Rob Davies, die minister van handel en nywerheid, en Sindi Chikunga, die adjunkminister van vervoer, het ook kommersieel na China gevlieg om by Zuma aan te sluit.

“[Die joernalis] noem ook dat minister Gordhan ‘stilweg sy eie program in China gevolg het’. Dit is ʼn algehele versinsel. Minister Gordhan en minister Nkoana-Mashabane het die president na al sy vergaderings vergesel sedert hulle in Hangzhou aangekom het,” het Ngqulunga gesê.

Hy het City Press verder oor die kole gehaal omdat die koerant glo nie die presidensie om kommentaar genader het nie, maar slegs vir Gordhan oor die bewerings uitgevra het. “Vir die rekord, die president hoef nie saam met ministers in dieselfde vliegtuig te reis nie. Daar is geen sodanige vereiste nie,” het Ngqulunga gesê.

“Ons vertrou dat City Press nie besluit het om ʼn sekere siening oor ʼn saak te hê en stories so te verpak dat dit aan hierdie vasgestelde narratief voldoen, ongeag die feite nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

18 Kommentare

jongste oudste gewildste
Lance

Ag niemand glo nog wat die zuma se nie so maak maar jou persverklaarings all you like …mense sien jou as n dief en n skelm …en mens kan nooit jou reputasie terugkoop met geld nie !

Jakkalas

Al wat ons die “Jan publiek” in belangstel is die feite. Die res is net sensasiolisme en niemand baat daarby. Ek hoop hulle feite is reg anders stel ou Zumpie weer ‘n eisie in. Werk aan daai aftree pakket……

Hasie

Hoekom moet Zuma altyd anders wees? Hoekom kon hy nie ook kommersieel gevlieg het nie. Daar kon dan baie op sekuriteit gespaar gewees het. Sodra Zuma stil raak is hy met iets onheilige besig. Dit is soos Lance sê, sy reputasie is verdoemend

Sarie

Vir ‘n land wat naby rommelstatus is dit ondenkbaar dat soveel geld op reise van ministers spandeer word. Wat was Zuma se bydrae tot die vergadering. Ek wed jou hy het net plek volgemaak. Dalk agteraf gekonkel met sy Chinese kamerade daarom moes hy alleen vlieg sodat hy ‘n bietjie langer kon agterbly om ons land verder aan die Chinese uit te verkoop sodat hulle kos vir sy trop vrouens kan voorsien.

Jan

Maak regtig nie meer saak wat berig word nie, alle geloofwaardigheid uit hierdie kamp is lankal daarmee heen. Geld word op groot skaal vermors en die armes krepeer.