President saam met pendelaars op trein gestrand

Pres. Cyril Ramaphosa en David Makhura, premier van Gauteng, by ʼn treinstasie in Pretoria as deel van ʼn verkiesingsveldtog. (Foto: Thobile Mathonsi/ANA)

Pres. Cyril Ramaphosa het Maandag eerstehands een van die gereelde frustrasies van gewone Suid-Afrikaners ervaar toe hy ure lank saam met ongelukkige pendelaars op ʼn stilstaande trein gestrand was.

Ramaphosa het as deel van ʼn verkiesingsveldtog net voor 08:00 saam met pendelaars op die trein by die Mabopane-stasie in Pretoria geklim. Die trein was toe reeds meer as ʼn uur laat.

Op pad na Bosman-stasie, waar Ramaphosa later afgeklim het, het die trein twee keer onverklaarbaar stilgestaan – een keer by Marabastad-stasie en die tweede keer by die Technikon Rant-stasie. Dit het nog twee uur by die pendelaars se reistyd gevoeg.

Sommige pendelaars wat klaar laat was vir werk het afgespring en werk toe gestap, terwyl Ramaphosa op die trein gesit en wag het. Hy is vergesel deur David Makhura, premier van Gauteng, terwyl ander ANC-leiers na ander treinstasies in Tshwane gegaan het as deel van die verkiesingsveldtog.

By Bosman-stasie het Ramaphosa en Makhura ʼn skare toegespreek wat gretig op hulle gewag het. “Dit is onregverdig teenoor ons mense. Ons treine is laat en kry mense nie betyds by die werk nie. Ons gaan ʼn vergadering met Prasa byeenroep,” het Makhura gesê.

Ramaphosa het op sy beurt aan die skare gesê hy het eerstehands die probleme beleef wat mense op ʼn daaglikse grondslag moet hanteer. “Mense kla daar is boewe op die treine en ons kan bevestig daar is geen sekuriteit op hierdie treine nie,” het die president gesê.

“Die trein is stadig en het om onverklaarbare redes stilgestaan. Dit is onaanvaarbaar dat dit drie uur duur om ʼn 50 km-reis af te lê en dit moet nou end kry. Ons gaan met Prasa praat en vir hulle sê hulle moet dit uitsorteer.”

Ramaphosa het gesê om die toestand van die treine te verbeter is een van die party se mandate omdat dit ʼn negatiewe uitwerking op die ekonomie het. “Mense wat treine moet gebruik, gaan noodwendig in die moeilikheid kom. Hulle word afgedank, kry waarskuwings en word gedissiplineer omdat hulle laat by die werk opdaag.”

Ramaphosa het ook aan die skare gesê hulle werk aan die huidige beurtkragprobleem.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

42 Kommentare

jongste oudste gewildste
chrissie

Dan moet hy besoek by skole aflê..ook by Eskom..ook by staats hospitale..dan ook by binnelandse sake…dan ook is daar n lys van plekke in S.A waar dinge “gebreuk” is.

Snowball

Wat ‘n heldedaad! Sit op ‘n trein wat laat is om ‘n paar stemme te werf.
Wat van bietjie oorslaap op ‘n plaas, so sonder daai veilgheidswagte wat belastingbetalers voor betaal?
Laat wees is een ding, koelbloedig vermoor is ‘n heel ander storie.
Verkiesingsveldtog à la ANC. Gmpf!

AP

Ha Ha lekker lag ek nou , anc is die rede vir agteruitgang

IK

Trein wat ‘onverklaarbaar’ gaan staan. Ai, die blinde sambok darem . . .

GM

Hy gaan sit een dag daar saam met die mense, seker omring met sy sekuriteitswagte, en nou maak hy of hy weet waardeur die pendelaars elke dag gaan, hahaha.

Ek stem saam, hy kan gerus bietjjie behandeling gaan ontvang by ‘n staatskliniek en hospitaal. Die enigste probleem is, hy sal voorkeur behandeling kry, en nie 7 ure by die kliniek hoef te sit soos ‘gewone mense’ nie.