Pretoria-betogings: Spesiale sentrum op die been gebring

Foto: Facebook

Foto: Facebook

ʼn Gesamentlike operasiesentrum is op die been gebring om die massabetogings wat sedert Sondagaand oor die hele Pretoria woed in bedwang te probeer bring.

Die Suid-Afrikaanse Polisiediens (SAPD) het in ʼn verklaring gesê die sentrum sal bestaan uit beamptes van verskillende wetstoepassingsagentskappe en ander rolspelers. Alle polisielede in die stad, asook dié wat van diens af is, is ontplooi in Arcadia, Mamelodi, Soshanguve, Atteridgeville en in die weste van Pretoria. Lede van die SAPD-hoofkantoor is ook ontplooi om met die polisiëring te help.

Volgens die SAPD word ʼn saak van moord ondersoek nadat ʼn ANC-lid Sondag tydens die geweld doodgemaak is. Sake van opsetlike saakbeskadiging en intimidasie is ook aangegee.

Intussen is die N1 tussen die Pumulani-tolhek en Hammanskraal en die R101 gesluit weens betogings. In Atteridgeville is Seeiso-, Maunde- en Khozastraat deur betogers versper en die Daspoort-tonnel in die weste van Pretoria is ook gesluit nadat dit met brandende bande versper is. Die R80 in Pretoria-Noord is vanaf Britsweg ook deur betogers afgesper.

Busse wat oornag in Mamelodi, Pretoria gebrand is (Junie 2016). Foto: Facebook

Busse wat oornag in Mamelodi, Pretoria gebrand is (Junie 2016). Foto: Facebook

Volgens berigte op sosiale media is drie vragmotors Dinsdagoggend aan die brand gesteek.

Ondanks verskeie pogings kon die provinsiale polisiewoordvoerder nie Dinsdagoggend vir kommentaar bereik word nie. Die woordvoerder van die Tshwane-metropolisie was ook nie beskikbaar nie.

Die ANC het Maandag aangekondig dat Thoko Didiza die party se burgemeesterskandidaat in Tshwane vir die komende munisipale verkiesing sal wees. Kgosientso Sputla Ramokgopa, die huidige burgemeester, asook sy adjunk-streeksvoorsitter, Mapiti Matsena, sal dus nie weer verkiesbaar wees nie. Die ANC in Pretoria is glo verdeeld in hul ondersteuning aan Ramokgopa en Matsena is ongelukkig omdat Didiza uiteindelik die keuse van die ANC se nasionale leierskap was.

Lebogang Matji, ʼn woordvoerder van die Tshwane Metro-munisipaliteit, het gesê Ramakgopha sal vanaf 10:00 vandag die gebiede besoek waar die geweld woed om met die inwoners te vergader.

Betogings Maandagaand (20 Junie 2016) in Pretoria. Foto: Verskaf

Betogings Maandagaand (20 Junie 2016) in Pretoria. Foto: Verskaf

Donald Liphoko, die waarnemender direkteur-generaal van die regering se kommunikasie-en-inligtingstelsel (GCIS), het Dinsdagoggend namens die regering die geweld ten sterkste veroordeel en ʼn beroep op inwoners gedoen om die betogings te staak. “Geweld, saakbeskadiging en oortreding van ander se reg op vrye beweging sal nie deur die wetstoepassingsagentskappe geduld word nie en oortreders sal die volle mag van die gereg in die gesig staar,” het hy gesê.

“Daar is geen kwessie wat nie deur demokratiese prosesse en dialoog opgelos kan word nie. Lede van die publiek word aangemoedig om van die regte kanale gebruik te maak om hul ontevredenheid uit te spreek.”

Lees alle vorige berigte oor die Pretoria-onluste op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

70 Kommentare

jongste oudste gewildste
Johann Marx

Dit bly steeds skrikwekkend dat daar op elke “hoof aar” wat uit die meeste groot stede loop ‘n informele nedersetting is wat daardie stad binne minute heeltemal kan afsluit….sodat niemand IN of UIT kan beweeg nie??

Gerhard

Maroela, kan julle dalk ‘n kaart met die brandpunte publiseer wat gereeld opgedateer kan word sodat mens kan sien watter areas om te vermy en areas wat naby gevaarpunte is?

Marietjie

Die anc pluk nou die vrugte van hul wandade en leuns. Veiligheids mense moet nou hul lewens in gevaar sit om die barare onder bedwang te bring. Hoekom kom kyk zuma en kie nie hoekom die belasting betaler se geld verder vermors word nie, nee hulle is te bang. Geweld is ok in SA nie een van die brandstigters of klip gooiers word in hegtenis geneem nie. Ander lande moenie sien hoe sleg dit in SA gaan nie, vermy alle media dekking daaroor.

vierkleur

lyk soos n oorlog sone. Die terroriste is nou besig om meer openlik te verwoes.
maar daar is niks kort met die reenboog nasie nie,of hoe?

Loerie

Ag dit gaan nog altyd so in hierdie land. Ek het groot geword met hierdie soort onrus en verwoesting. Dis al 40 jaar en niks het verander nie, en niks sal verander nie.