Pretoria in donkerte weens brand, tegniese probleme

Die Kwagga-substasie was vroegoggend in ligte laaie. (Foto: Verskaf)

Die Tshwane-metroraad het Dinsdag alle beurtkrag in die stad gekanselleer nadat die Kwagga-substasie in die weste van die stad Dinsdagoggend vlam gevat het.

Eskom implementeer tans fase 4-beurtkrag in die res van die land.

Groot dele van die noorde en weste van Pretoria se krag is afgesny nadat die brand, vermoedelik weens ʼn olielek, uitgebreek het. Volgens die Tshwane-stadsraad se Twitter-inskrywings is omliggende dele tot so ver as Soshanguve sonder krag gelaat.

Frans Smith, ʼn DA-raadslid in die Moot, sê Rosslyn, Atteridgeville, Laudium, Sunnyside, Parktown, Mayville, Wonderboom, Sinoville, Bon Accord, Magalieskruin en Pretoria-Noord sit tans sonder krag. “Die grootste deel van die Moot is egter nie deur die brand geraak nie omdat dié se krag van die Rooiwal-substasie afkomstig is.”

Smith het aan Maroela Media gesê dat die skade aan die substasie na raming sowat R150 000 tot R180 000 beloop en dat een transformator in die brand beskadig is. “Hierdie substasie ontvang redelik baie krag van Eskom en verskaf krag aan ʼn groot deel van Pretoria. Ons weet nog nie hoe lank die herstelwerk gaan neem nie, maar ons vra inwoners om geduldig te wees,” sê hy.

Smith sê egter dat dit so lank as ʼn week kan duur om die substasie weer volkome aan die werk te kry. Intussen gaan die twee ander transformators ingespan word om krag te verskaf en sal ʼn derde transformator vir bystand gebruik word.

“Ons vra inwoners om toestelle wat baie krag trek, soos yskaste, warmwatertoestelle en stowe, af te skakel tydens beurtkrag. Hierdie toestelle oorlaai gewoonlik die substasies wanneer die krag weer aangeskakel word en dit neem dikwels langer om krag weer na ʼn area te herstel,” sê hy.

Nog dele sonder krag

Intussen is verskeie ander dele van Pretoria ook sonder krag gelaat weens tegniese probleme by ander substasies in die stad.

Nellmapius-uitbr. 2, in die ooste van die stad, se krag is af nadat ʼn skakelaar wat krag van die Waltloo-substasie voer, afgegaan het. Die stadsraad sê hy kan as gevolg van die reën nie die lyne nagaan om die fout op te spoor nie.

Dele van Mamelodi is ook tans sonder krag as gevolg van ʼn kabelfout tussen die Letoaba- en Morwa-minisubstasie. Die kabelfout lê in areas wat verspoel is en sal herstel word wanneer die water gesak het.

In Moreleta Park het ʼn 315 kVA-minisubstasie in Seanstraat ook aan die brand geslaan. Die brand word tans deur die metro ondersoek.

Kopergeleiers in die Lynwoodrif-omgewing is boonop gesteel. Die metro was in die proses om die geleiers te vervang.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

29 Kommentare

jongste oudste gewildste
Martin

Nou gaan ESKOM weer die skuld kry !!!!!!

emily

Die hele Jan Shoba str was ook sonder krag.
Ek wens net julle wil mense aanstel wat BEVOEGD is om die werk te doen.
Ons lei onder julle swak BESTUUR.

James

O aarde, lyk of alles nou in mekaar stort in SA. Wil mens laat dink vlug as jy kan.

Dirk

As daar meer inspeksies en instandhoudings gedoen word sal sulke goed nie gebeur nie..

Sê maar net

Mense ons kan sê en doen net wat ons wil. Eending staan soos ‘n paal bo die water uit en dit ons nader baie vinnig die eind tyd. Die onder tekening van die een wêrekd orde is reeds gedoen, en dit opsig self beteken dat die regerings beheer oor die mense gaan kry. Kyk hoe desperaat is ons nie oor die krag nie. So gaan die een ding op die ander lei. Wees waaksaam asb..