Pretoria-onluste woed voort; weermag dalk ontplooi

Ramokgopa spreek inwoners toe. Foto: ANA

Ramokgopa spreek inwoners toe. Foto: ANA

Massabetogings woed steeds voort in en om groot dele van Pretoria, glo weens ontevredenheid oor die ANC se burgemeesterskandidaat vir die Tshwane-metrogebied.

Die ANC het Maandag aangekondig dat Thoko Didiza die party se burgemeesterskandidaat in Tshwane vir die komende munisipale verkiesing sal wees. Kgosientso Ramokgopa, die huidige burgemeester, asook sy adjunk-streeksvoorsitter, Mapiti Matsena, sal dus nie weer verkiesbaar wees nie.

Die besluit het massabetogings in townships in en om Pretoria tot gevolg gehad. Geweld het op verskeie plekke uitgebreek en eiendom is vernietig. Die betogings het ook met plundery gepaardgegaan.

Minister Nosiviwe Mapisa-Nqakula, minister van verdediging, gaan Dinsdagmiddag om 16:00 die media toespreek oor die onluste. Dit laat die vermoede ontstaan dat die weermag moontlik ontplooi kan word.

Ramokgopa sou ook die media toespreek maar dié mediakonferensie is intussen gekanselleer. Ramokgopa vergader tans met gemeenskapslede in Atteridgeville. Verskeie ander ANC-leiers is ook teenwoordig.

Die Suid-Afrikaanse Polisiediens (SAPD) het vroeër in ʼn verklaring gesê ʼn spesiale krisissentrum is op die been gebring om die onrus te hanteer. Alle polisielede in die stad, asook dié wat van diens af is, is ontplooi in Arcadia, Mamelodi, Soshanguve, Atteridgeville en in die weste van Pretoria. Lede van die SAPD-hoofkantoor is ook ontplooi om met die polisiëring te help.

Die situasie in Atteridgeville. Foto: ANA

Die situasie in Atteridgeville. Foto: ANA

In die Pretoriase middestad is talle winkels gesluit uit vrees vir plunderaars. Blessing Manale, burgemeesterswoordvoerder, het aan Maroela Media gesê die BKS-gebou in Pretoriusstraat, Isivuno-huis in Lilian Ngoyistraat en die burgemeester se kantore in Centurion is as voorsorgmaatreël ontruim.

Die situasie is steeds gespanne in die weste van Pretoria waar betogers in Van der Hoffweg bedrywig is. Die Daspoort-tonnel is vroeër gesluit nadat dit met brandende bande versper is. Die R80 in Pretoria-Noord is vanaf Britsweg ook deur betogers afgesper.

ʼn Bus is vroeër vanoggend in Atteridgeville naby die Kalafong-hospitaal aan die brand gesteek. Seeiso-, Maunde- en Khozastraat is deur betogers versper. Betogers het ook amok gemaak by WF Nkomo- en Kalafongweg.

Die situasie in Hercules, wes van Pretoria. Foto: Twitter

Die situasie in Hercules, wes van Pretoria. Foto: Twitter

In Soshanguve is talle uitgebrande vragmotor- en motorwrakke sigbaar. Talle winkels, waaronder die van buitelanders, is geplunder. Die Soshanguve Crossing Mall in Ruth First- en Aubrey Matlalastraat het volgens berigte sy deure gesluit uit vrees vir plunderaars. Betogers maak ook amok in Stinkwater tussen Soshanguve en Hammanskraal.

Die Bakwena N1/N4-tolstelsel het op Twitter gesê die N1-noord tussen Pumulani en Carousel is oop en veilig om te gebruik. “Die N1-suid is ook oop en veilig.”

In Mamelodi is glo meer as 20 busse Maandagaand aan die brand gesteek. Busse en vragmotors word nou glo deur die polisie uit die gebied begelei. Betogers is volgens berigte egter steeds besig om amok te maak terwyl polisiehelikopters in die lug waargeneem is. Die Denneboom-winkelsentrum en Denlyn Mall het ook onder plunderaars deurgeloop.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

49 Kommentare

jongste oudste gewildste
Kosie

Is dit demokrasie?
Of wat sou julle die soort gedrag noem?
Ek se as jy nie saam stem met wat jou party doen nie stem vir enige opposisie. nie waar nie?

goose☆

Watter weermag ?

cobusp

Die storie gaan het nog n giftige stert aan…………….sal nie verbaas wees as die rook en as gaan le het nie APPARTHEID die skuld gaan kry………………..

Grensvegter

Lesotho se weermag. Hulle is spanne beter as die huidige SA weermag.

Lizel smit

ons is 6 weke weg van verkiesing en dit gaan nou al so, ai ai