Provinsiale DA-leier vermis in Nepal

Petro Nel, adjunkleier van die DA in Noordwes, word vermis nadat die ligte vliegtuig waarin sy ʼn passasier was Donderdag verdwyn het terwyl dit oor Nepal gevlieg het.

Nel het glo verlede week van Suid-Afrika na Nepal gereis. Joe McGluwa, DA-leier in Noordwes, het gesê Nel is Donderdag as vermis aangemeld. “Sy is met vakansie daar en was op besigtingsvlug oor ʼn bergagtige gebied toe kontak met die vliegtuig verloor is.”

Volgens McGluwa is twee helikopters ontbied om na die vermiste vliegtuig te soek. Nel is ook ʼn DA-raadslid in die Matlosana-munisipaliteit in Klerksdorp. “Sy is ʼn toegewyde lid van die party en ons almal hoop vir haar veilige terugkeer.”

DPA berig intussen dat die vliegtuig sowat ʼn halfuur na opstyging kontak met die beheertoring verloor het en dat daar sedertdien na Nel en Vallery Buttenin, ʼn Russiese vlieënier, gesoek word.