Pta-man wat rowers doodskiet stuur vrou, kinders landuit

Ferdie van Greunen (Skermskoot uit die video)

Die Pretoriase man wat Saterdag twee rowers op sy erf doodgeskiet het en vroeër dié week doodsdreigemente by sy huis ontvang het, se gesin het om veiligheidsredes tydelik na die buiteland verhuis.

Die 47-jarige man, deur eNCA geïdentifiseer as Ferdie van Greunen, het aan dié nuuskanaal gesê hy het geen ander keuse gehad as om sy vrou en kinders na die buiteland te stuur nie nadat ʼn groep van tussen 10 en 12 mense Maandagoggend by sy huis bymekaargedrom en geskree het: “Ons weet waar jy bly! Ons gaan jou doodmaak!”

Van Greunen het gesê die gesin vrees vir hul lewe, selfs met die veiligheidswagte buite sy huis – wagte wat ná die voorval van intimidasie nou die eiendom 24 uur per dag beskerm.

“Dit was ʼn liederlike voorval,” het Van Greunen aan eNuus gesê. “Hier het voertuie opgedaag by my eiendom; seker tien vreemdelinge. My werker het my nadergeroep. Met ondersoek [wat hy na die voorval ingestel het] is ek uitgekryt as moordenaar en [ek het gehoor] dat my adres bekend is en dat hulle weet waar ek woon en gaan terugkom om my te vermoor. Daarom dan ook die besluit om my vrou en kinders van enige potensiële leed en skade weg te kry en nie hier [in Suid-Afrika] te hê nie.”

ʼn Baie emosionele Van Greunen het in trane uitgebars toe hy oor dié voorval praat wat nou sy gesin se hele lewe omvergewerp het. “Ek wil net vir my wonderlike vrou sê ek is baie lief vir haar en die kinders. Uit my hart se punt is ek lief vir hulle en ek sal hulle altyd beskerm.”

Van Greunen het Maandag ná die voorval ʼn saak van intimidasie by die Garsfontein-polisiestasie aanhangig gemaak.

Kapt. Dave Miller, woordvoerder van die polisie, het Vrydag aan Maroela Media bevestig dat die betrokkenes ʼn teenklag teen Van Greunen ingedien het. Volgens Miller voer die betrokkenes, glo familielede van die oorledenes, aan dat Van Greunen ʼn vuurwapen op hulle gerig het, maar hy het dié bewerings in ʼn onderhoud met eNuus ontken.

Miller het intussen ook bevestig dat die rowers se voertuig ʼn gesteelde voertuig was. Hy sê die polisie ondersoek ook die moontlikheid dat een van die rowers wat Van Greunen doodgeskiet het, uit was op parool.

Maroela Media het vroeër berig die voorval het laat Saterdagmiddag in Lynnwoodrif plaasgevind. Die gesin het by die huis gekom en agtergekom die voorste hek is oop, waarna hulle ʼn vreemde silwer voertuig in hul oprit naby die motorhuis opgemerk het.

Van Greunen het uit die voertuig geklim en gaan ondersoek instel. Een verdagte het verby hom gehardloop. Miller het vroeër vertel Van Greunen het probeer om die verdagte wat verby hom gehardloop het te vang, maar die verdagte het hom ontduik en terug in die huis in gehardloop. Intussen kon ʼn tweede verdagte daarin slaag om verby Van Greunen te kom en in die voertuig, met die man se gesin steeds daarin, te spring.

Dié verdagte het probeer om in trurat weg te jaag, maar het volgens Miller “gelukkig” teen die muur vasgery en kon nie verder beweeg nie. Van Greunen het na die voertuig gehardloop en daar probeer help en in die proses is die verdagte doodgeskiet. Intussen het die tweede verdagte in die boosdoeners se wegkommotor gespring en herhaaldelik teen die gesin se voertuig, wat die oprit versper het met die gesin steeds binne-in, vasgery.

Die verdagte kon nie daarin slaag om by die oprit uit te ry nie. Hy het Van Greunen weer probeer aanval en Van Greunen het homself weer verdedig. Die tweede verdagte is in die proses doodgeskiet.

Die insetsel is deur eNuus vervaardig. Kyk eNuus elke aand om 19:00 op kanaal 144 en 145 op DStv.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

31 Kommentare

jongste oudste gewildste
Ander Annie

Sterkte mnr Van Greunen, ons bid vir ons Hemelse Vader se beskermde Hande oor jou en jou gesin.

Joeee-hoeee!!??

Joeee-hoeee!!??, Lindiwe Sisulu, hoor jy wat hier in jou veilige land gebeur!!?? Daar is diegene wat diep beswaard is wanneer ‘n rooftog nie slaag . . . Laat weet Australië asb.

Cherokee

Volgens die video is daardie man se senuwees op breekpunt. Hy het groot werk gedoen. Voorspoed Ferdi, en netjies dat jy aan die blootgesteldes gewys het om gereed te wees.

Joey

Die man is die hoof van die huis en moet sy familie beskerm. Deur kriminele is ñ hele gesin se lewe uitmekaar geskeur. Daar sal altyd letsels wees. Ek voel inwoners van die omgewing behoort nou saam te staan en hierdie dapper man te ondersteun en die polisie dwing om op te tree teen die wat dreigemente maak .Baie sterkte aan die familie en veral aan Ferdie. Ekmhou jou en familie in my gebede.

Henk

My vriend, my hart bloei vir jou en jou vrou. Baie sterkte vir julle beproewing, ons gaan bid vir julle. Daar is ń plek vir opregte Afrikaners, baie naby aan jou.