Die polisie se bomeenheid het Maandag 15 Tweede Wêreldoorlog-springstoftoestelle van ʼn skrootwerf in Pretoria-Wes verwyder nadat ʼn man die oggend tydens ʼn ontploffing gesterf het.
“Ses van die ou militêre toestelle in Rebeccastraat was steeds lewendig,” het kapt. Tsekiso Mofokeng, woordvoerder van die polisie in Gauteng, gesê.
Die man is Maandag tussen 08:00 en 09:00 oorlede en nog ʼn man ernstig beseer toe een van die toestelle by die skrootwerf ontplof het.
Dit is nog nie duidelik of die mans wel werknemers van die skrootwerf was nie.
Volgens Mofokeng dui die voorlopige ondersoek daarop dat die ontploffing ʼn ongeluk was. Die polisie doen ʼn geregtelike doodsondersoek.
Dit is ook nog nie bekend hoe die antieke ploftoestelle by die skrootwerf beland het nie. “Ons doen ʼn beroep op die gemeenskap om met enige inligting na vore te kom,” het Mofokeng gesê.
Die strate rondom die skrootwerf is aanvanklik afgesper, maar is teen vroegmiddag weer oopgemaak.
Die mense vd skrootwerf moet weet by wie hulle die ploftoestelle gekoop het. As daar yster inkom sien hulle net $$ net soos die koperpyp en koperdraad wat hulle aankoop?
Wat van nuwe wetgewing teen die verkoop van yster aan skrootwerke? So bietjie papier werk…… Dan sal die telefoon netwerke nog hopelik kan werk en die treine nog op treinspore kan ry…….