Pta-sanger tydens beurtkrag in spitsverkeer met mes gesteek, beroof

Charlie Smidt en sy meisie Natasha Hattingh. Foto: Facebook.

Charlie Smidt van die groep Beeskraal en sy meisie Natasha Hattingh. Foto: Facebook.

Charlie van die gewilde Afrikaanse musiekgroep Beeskraal is Donderdagmiddag tydens spitsverkeer in Pretoria se middestad, terwyl beurtkrag toegepas is, van sy selfoon beroof en met ʼn mes gesteek terwyl hy gestrand in sy motor gesit het.

Charlie Smidt, wat ook die skakelbeampte van die FAK is, het Vrydag aan Maroela Media gesê hy was op pad van sy kantoor by die Voortrekkermonument na sy huis in Villieria en het deur die stad gery en in ʼn verkeersknoop vasgesit.

charlie beeskraal beroof pretoria

Charlie se bebloede wond.

“Ek was by die oorgang van Jeppestraat en Robert Sobukwestraat (die voormalige  Esselenstraat) skuins oorkant die Sunnypark-winkelsentrum. Daar het baie mense rondgeloop en daar was ook straatsmouse. Omdat ek ʼn musikant is, ry ek nie met my lugversorging aan nie, so my venster was so ’n bietjie oop en my selfoon tussen my bene,” het Charlie verduidelik.

Hy het gesê twee mans het skielik teen sy motor gestaan en aanvanklik probeer om die deur oop te pluk, maar kon nie daarin slaag nie, want sy deure was gesluit. “Toe ek weer sien, is hul arms deur die klein gleufie in die venster. Albei was met messe gewapen. Een het sy mes onder my hoed in gedruk en teen my kop gehou. Hulle het gesê ek moet my foon oorhandig, wat ek toe gedoen het. Die ander man het my toe in my arm gesteek, waarna hulle heel rustig in die rigting van die winkelsentrum weggestap het.”

Charlie het gesê buiten een motoris wat op die aanvallers vanuit sy motor geskreeu het, het niemand anders iets probeer doen om hom te help nie. “Ek het hulpeloos gevoel. Ek wou hulle nie self agternasit nie, want het nie geweet hoeveel van hulle daar was en of hulle dalk met vuurwapens gewapen is nie.”

Hy het gesê hy het vir sowat twee blokke in die verkeer aangery en gevoel sy arm word warm van die bloed. “Gelukkig met die Here se genade was daar toe ʼn ambulans van die Steve Biko-hospitaal langs die pad. Ek het afgetrek en hul hulp ontbied. Die paramedici het my wond versorg en gerusgestel dat die mes darem nie ʼn hoofaar gesny het nie.”

Charlie het van daar af tot by sy huis gery, van waar hy en sy vriendin, Natasha Hatting, na die Montana-hospitaal is. “Die dokters het my wond mooi skoongemaak en vir my ʼn klem-in-die-kaak-inspuiting gegee en ek is ontslaan. Ek het nie nodig gehad om steke te kry nie, al is die wond baie diep in ʼn spier in.”

Hy het gesê die aanval was vir hom baie ironies. “Ek en Natasha het kaartjies vir Treurgrond gehad wat juis handel oor die doellose moord en doodslag in ons siek land en toe word ek op dieselfde dag met ʼn mes teen my keel geroof.”

Die voorval het hom egter nie verhoed om steeds die fliek te gaan kyk nie.

“Ek is net bly hulle het my nie erger gewond of op ʼn ander plek gesteek nie. Dit kon soveel erger gewees het. Die proses om ʼn nuwe foon te kry en weer al my kontaknommers terug te kry is erger as die wond op my arm,” het hy bygevoeg.

Charlie het nog nie die voorval by die polisie aangemeld nie en is van voorneme om dit Vrydag te doen.

Hy het gesê Beeskraal tree nie die naweek êrens op nie en sy besering behoort nie toekomstige optredes te benadeel nie.

Die kruising waar die voorval plaasgevind het. Foto: Googlemaps

Die kruising waar die voorval plaasgevind het. Foto: Googlemaps

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

25 Kommentare

jongste oudste gewildste
Pierre Celliers

Jammer om te hoor van jou “Afrika nagmerrie” Charlie. Hoop jy herstel gou.
Se vir Kevin Ek geniet daai Fender amp nog baie! Voorspoed!!

Tommie

Die beurtkrag is besig om hande uit te ruk. Ons het die afgelope paar aande vanaf 20h00 tot 10h30 in die donker gesit. Kinders moet leer vir eksamen. Ek beleef beurtkrag by die werk en tuis. Probeer dan my die werk wat ek in die dag verloor in die aand inhaal. Ons ervaar dus vyf ure se beurtkrag per dag. Dis hoog tyd dat die ANC tot ‘n val gekom! Kan die parasiete nie verdra nie!

pop

Hier is ek nou alweer dom. hoekom kan mens nie met lugversorging ry as jy sanger is nie. Is die warm of yskoue lug wat by die venster instroom beter vir stembande?? Nietemin, eks jammer vir jou ondervinding met gemors van die samelewing, maar almal wat hier lees weet ook nou, maak toe venster, sluit toe deure as jy tot stilstand gedwing word deur die regering se onbevoegdheid.

JC

Tommie my ou maat,laat ek jou teleur stel,die ANC gaan nooit tot n val kom nie. Dit is klaar my maat. Die wat vir die ANC stem is te veel in die land. Dit is hoekom ek reeds 11 jaar in Australia sit. My hele huisgesin was amper bokveld toe in my eie land n paar jaar gelede. Ek het die beste besluit vir my en my huisgesin geneem. Vandag kyk ek nie terug nie. Die ANC gee niks om vir vir die wit Suid Afrikaners nie. Ek het nou n groot besigheid in Australia en het meer as wat… Lees meer »

Elsie

Ja JC jy het die regte besluit gemaak maar ons is nie almal so bevoorreg om net op te pak en land te verlaat nie. Veral nie as my man werkloos is in ons nuwe Suid Afrika soos baie ander blanked en nog minders ook het nie. Ons moet maar veg vir wat ons voorvaders nagelaat het. Charlie jammer om van Jou voorval te hoor en sterkte