Pta-skool gesluit ná oproerige ouers plek vir leerders eis

(Argieffoto: Facebook)

Die Hoërskool Gerrit Maritz in die noorde van Pretoria is Donderdag vir ʼn tweede agtereenvolgende dag gesluit, nadat oproerige ouers na die skool opgeruk het.

Die groep het Woensdag, op die eerste dag van die skooljaar, geëis dat plek beskikbaar gestel word vir hul kinders.

Ouers in Gauteng moes op die provinsiale onderwysdepartement se aanlyn registrasiestelsel aansoek doen om plasing vir graad 1- en graad 8-leerders. Teen Mei verlede jaar was daar reeds 3 096 aansoeke om plasing by dié dubbelmediumhoërskool. Dit is veel meer as wat die skool kan akkommodeer.

Chris Klopper, uitvoerende hoof van die Suid-Afrikaanse Onderwysersunie (SAOU), het gesê die afvaardiging ouers was Woensdag aanvanklik by Hoërskool Akasia en Hoërskool Pretoria-Noord, waarna hulle na Hoërskool Gerrit Maritz is.

Die skoolhoof het in oorleg met die onderwysdepartement en die skool se beheerliggaam beveel dat die skool gesluit word, nadat veiligheidskommer oor die situasie en die ouers se optrede beduidend toegeneem het.

Die skool was vandag steeds gesluit.

Daar was ook gerugte dat die ouers se optrede polities gedrewe is.

“Die optrede wek groot kommer. Ons lede word in gevaar gestel en dit is onaanvaarbaar dat kinders se onderwysregte so vertrap word,” het Klopper gesê.

Hy sê daar is groot begrip vir ouers wat desperaat is om hul kinders by skole te laat plaas, maar dat die kwessie van plasings nie by die skool self uitgestryk kan word nie. Dit moet op distriksvlak hanteer word.

Die Gautengse Departement van Onderwys het Woensdag gesê hulle het meer as 10 000 laat aansoeke vir plek in skole in dié provinsie ontvang. Dit nadat die departement verlede jaar maande gespook het om al die leerders te plaas wat betyds aansoek gedoen het vir 2020.

Steve Mabona, woordvoerder van die Gautengse onderwysdepartement, het gesê amptenare van die departement is by die skool om met ouers te vergader en ʼn aanvaarbare oplossing vir alle betrokkenes te probeer vind.

Mabona het gesê ouers word egter ten sterkste afgeraai om onderrig in die proses te ontwrig.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

34 Kommentare

jongste oudste gewildste
Danie

Dit is seker maar wat gebeur wanneer jy jou kind se opleiding is die hoogs onbekwame hande van die regering los. En dit klink ook of daar nog minder logika by die ouers is. Geen skool kan skielik plek maak vir 3000 ekstra kinders nie. Die aansoeke werk ook op die beginsel van eerste daar kry eerste plek (ek hoop regtig dit is so).

Koos

Hoor nou hoe kerm die ou afrikanerkies en dit nadat hulle vir jare lank gedink het mandela is wonderlik en die anc is maar orraait en die awb was mos agterlik ne…

Erika

Is tyd dat Lesufi liewers begin skole bou vir die land en puttoilette vervang!

Kootjie

Nee swaer!! By party mense werk dit baie baie anders!! Me..mi… and I!! Dis waaroor dit gaan!! Ek eerste!! Bogger die res!!!

Abel

Koos jy praat so waar aiai kom byt als die mense nou