Pta-vrou se lyk gevind ná bure onraad vermoed

polisie-huisroof-crime

Argieffoto: SAPD/Facebook

ʼn Bejaarde vrou se liggaam is Donderdagoggend in haar huis in Pretoria aangetref nadat haar bure onraad vermoed en die polisie ontbied het.

Sers. Sam Shibambo, woordvoerder van die polisie, het aan Maroela Media gesê vier mense is reeds in verband met die moord in hegtenis geneem.

Volgens Shibambo het ʼn huurder, wat ʼn kamer in die vrou se huis sou huur en gister sou intrek, vroeg die oggend met sy meubels by die huis in Makennalaan in Eersterust aangekom. Die hek was egter gesluit en daar was geen teken van die eienaar nie. Hy het by die bure navraag gedoen en by nadere ondersoek het hulle besef dat die veiligheidshek van die huis oopgebreek was.

“Die bure het die polisie ontbied en beamptes het in die huis ingegaan waar hulle die 76-jarige vrou se liggaam aangetref het,” het Shibambo gesê. “Sy het steekwonde aan haar liggaam gehad, maar die oorsaak van haar dood is nog nie amptelik bevestig nie.” Verskeie elektroniese items is uit die huis gesteel.

Shibambo het gesê die polisie het dadelik met hul ondersoek begin en kort daarna tweelingbroers en hul medepligtige, wat net ʼn paar huise van die slagoffer af woon, in hegtenis geneem. Later die middag is die vierde verdagte vasgetrek.

Volgens Shibambo sal die verdagtes Maandag in die Pretoria-landdroshof verskyn op aanklagte van moord en huisroof. Die oorledene se naam kon nie onmiddellik bekendgemaak word nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

3 Kommentare

twakkies ·

Oorhandig die skuldiges oor aan doe gemeenskap om met hulle gal te werk tot hulle tyd verby is

Veritas ·

Die arme voornemende huurder. Skielik is sy lewe ook omvêr gewerp. Alles was gereël en heel moontlik het hy alreeds sy huurgeld of deposito of albei, alreeds betaal. Die lewe het ‘n manier om snaakse draaie met ‘n mens te loop.

Netjies ·

Ek het op Google Earth gaan kyk na Makennalaan. Werklik ‘n netjiese straat.
Sterkte aan die fam. van die oorledene en mag die moordenaar(s) SWAAR gestraf word.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.