Pta-vrou weer geopereer ná weermaglid haar glo skiet

Carine van Staden en Johan Harmse. Foto: Via Facebook

Carine van Staden (28), ʼn inwoner van Pretoria wat glo ten aanskoue van haar verloofde deur ʼn lid van die weermag in haar bors geskiet is, moes ʼn operasie ondergaan om van bloed in haar linkerlong ontslae te probeer raak.

Johan van Staden, Carine se pa, het Woensdag aan Maroela Media gesê sy dogter is Vrydag in die George Mukhari-hospitaal geopereer.

“Sy is die oggend 07:00 teater toe en was teen 13:00 terug in die waakeenheid. Haar dokters het haar long oopgesny om bloed uit te suig met die hoop dat dit die probleem sal oplos, maar X-strale wys dat daar nog bloed is,” het Van Staden gesê.

Carine is Maandag ontslaan om by die huis aan te sterk. Sy moet weer op 2 Oktober teruggaan hospitaal toe vir opvolgtoetse. “As daar dan nog bloed in haar long is gaan sy weer geopereer moet word en dit sal ʼn groter operasie wees.”

Van Staden het gesê Carine ervaar steeds baie pyn, maar dat sy positief is en ʼn mens haar nie sal hoor kla nie.

Intussen moet die weermaglid wat by die voorval betrokke was op 5 Oktober in die Pretoria-landdroshof verskyn op aanklag van poging tot moord. Hy is ná die skietvoorval, op 10 Augustus naby Wonderboom Junction, nie in hegtenis geneem nie.

Carine en haar verloofde, Johan Harmse (29), was dié dag omstreeks 18:00 van Daspoort, waar hulle woon, op Harmse se motorfiets op pad na vriende in Montana toe ʼn amptelike weermagvoertuig die motorfiets skrams getref het en weggery het. Die paartjie het hom agterna gesit en by ʼn verkeerslig voorgekeer, waarna hy Carine glo op ʼn kort afstand in haar linkerbors geskiet het. Die man het daarna glo ook sy vuurwapen op Harmse, wat nog op sy motorfiets was, gerig voordat die verkeerslig groen geword en hy weggery het.

Die weermaglid, vermoedelik ʼn motorbestuurder vir een van die generaals, het glo aan die Sinoville-polisie gesê hy het gemeen hy word gekaap.

Aanvanklik is ʼn klag van die afvuur van ʼn vuurwapen in ʼn openbare gebied asook roekelose en nalatige bestuur teen die weermaglid aanhangig gemaak voordat hy op waarskuwing vrygelaat is. Die saak is intussen na poging tot moord verander en die man het vroeër vandeesmaand kennis van die Nasionale Vervolgingsgesag ontvang om in die hof te verskyn.

Van Staden het gesê al verskyn die man eers byna twee maande ná die voorval in hof, hoop en bid hulle dat die regstelsel regverdig sal optree en dat reg sal geskied.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

18 Kommentare

jongste oudste gewildste
Haan

Ek verstaan nie die “glo” in talle van die MM opskrifte nie?
… weermaglid haar “glo” skiet
meisie gooi “glo” ander met kookwater

De Villiers

Die blatante dubbele standaarde waarmee rasgedrewe sake in hierdie land hanteer word, is skreiend. En al die trauma wat sy moes deurmaak. As die rolle omgeruil was, was dit hoog rassisme, is die man onmiddellik gearresteer en sou een of ander minister haar lankal besoek het.

Haan

“glo”… Is die feit dat hy haar geskiet het nog nie bevestig nie of hoe??

Chris Ws

Ons gebede is met die vrou.Ongelukkig is die kanse skraal dat die skuldige regverdig verhoor gaan word omdat ons regstelsel nie onpartydig is nie.Hy gaan baie lig hiervan afkom.

Boet Fasie

As die weermag lid wit was, was hy toegesluit sonder die keuse van borg. Carine hy het jou geskiet met ‘n weermag vuurwapen terwyl hy ‘n weermag voertuig bestuur het, dagvaar die weermag ( staat ) vir jou mediese onkostes, pyn en lyding