Publiek mag nie meer leeuwelpies vryf, sê reservaat

Argieffoto ter illustrasie. (Foto: Unsplash)

Die Renoster-en-leeu-natuurreservaat in die Wieg van die Mensdom by Maropeng in Gauteng het Maandag aangekondig dat die publiek voortaan nie meer leeuwelpies by dié reservaat mag vryf nie.

Die reservaat het in ʼn verklaring gesê hoewel hy die afgelope 30 jaar sy liefde vir diere met die publiek gedeel het, het dinge egter onder die bestuur van nuwe eienaars verander.

“Tye het verander. Onder die nuwe eienaarskap van die Bothongo-groep sal die reservaat nou op die welstand van diere fokus,” lui die verklaring.

Jessica Khupe, die reservaat se handelsmerkbestuurder, het verduidelik dat die nuwe bestuur bewus is daarvan dat dít wat in 1990 aanvaarbaar was toe die reservaat destyds vir die eerste keer geopen het, moontlik nie meer in 2019 aanvaarbaar is nie.

“Mense wou nog altyd naby aan wilde diere kom. Hoewel dit te verstane is, het studies getoon dat dit egter nie goed is vir die welstand van die diere is nie.”

Khupe het die publiek wat moontlik ongelukkig gaan wees oor die besluit verseker dat dit “die regte ding is om te doen”.

“As diereliefhebbers verstaan ​​ons hoe charismaties die natuurlewe van Afrika is. Maar die waarheid is dat ons liefde vir diere hulle egter onbewustelik kan benadeel, al is dit nie ons bedoeling nie,” lui die verklaring.

Volgens Mike Flynn, bedryfshoof by die reservaat, is die teel van welpies met die hoofdoel die publiek se aanraking nie net nadelig vir die diere nie, maar ook nie ʼn winsgewende sakemodel nie.

“Van nou af fokus ons daarop om die publiek in te lig oor die natuurlewe en die belang van bewaring. Dit is waarom ons met onmiddellike effek kies om ʼn einde te maak aan die vryf van welpies en hoop dat ander fasiliteite [ons voorbeeld] sal volg.”

Die reservaat het ook reeds ʼn driejaarplan van stapel gestuur om al sy fasiliteite op te knap met die welstand van diere in gedagte.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

24 Kommentare

El ·

Dit is wonderlike nuus! Hoop alle soortgelyke plekke volg julle!!

Essa ·

Goeie besluit! Respek en waardigheid vir diere in aanhouding. Hoop van harte ander volg die voorbeeld.

Bertus ·

Wil sien hoe lank daai plek gaan oop bly met gepaardgaande inkomste verliese.

Jakkels ·

Well done julle. Wens ander reservate sal in julle voetspore volg en diesele doen. Ek ondersteun nog nooit plekke wat welpies op skou sit vir almal om te vryf en meer te speel nie.

Patch ·

Baie goeie besluit, hoop ander plekke volg julle voorbeeld. Dis waarvoor honde en katte is, nie leeus nie. Vryf jou troeteldiere by die huis.

Lolla ·

Dis goed en wel, maar hoeveel besoekers besoek hulle spesifiek vir daardie rede. Nou gaan daar nie meer ‘n rede wees om te gaan nie, en die inkomste gaan drasties daal, want besoekers gaan nie meer deur die hekke kom nie, maar ek neem aan hulle het voorsiening gemaak daarvoor.

Eina ·

Gaan mense rerig net soontoe om net vir 10min met die leeus te speel? Ek twyfel darem.

Erika ·

Well done!! Waarvoor wil mense aan wilde diere vat! As hulle doodgebyt word is hulle families eerste wat eise instel teen instansies….

Cindy ·

Dis wonderlike nuus, dis hoog tyd dat diere eerste aan gedink word, nou moet daar net vir regte vir diere ook baklei word soos die mense in die land vir hulle mense regte wil baklei.

Retha Basson ·

Die beste nuus in n lang tyd.
Wilde diere het hulle habitat wat die mens moet respekteer. Hulle is onvoorspelbaar. Die mens het sy leefruimte waaroor hy heers.

Azil ·

Wonderlik iemand verstaan nou die term “wilde diere” – dis nie jou speelmaat …

Bossie ·

Fantasties maar ek is jammer, ek wil nog steeds nie gaan nie. Wilde diere in kampe is vir my net so erg. Dit is net nie hoe dit hoort nie.

Tina ·

Eerste tree in regte rigting. Nuwe eienaars se werk is uitgesit…. baie sterkte met die nuwe hoofstuk in die reservaat se storie. Hoop die paaie in die reservaat kry ook deeglike aandag…. ons het laaaankal opgehou om soontoe te gaan oor ‘n pap wiel na elke besoek (wat nie die leeus se werk was nie).

Gerda ·

Hulle sê in die berig dat die model nie meer winsgewend is nie. Ek glo namate bewustheid by mense toegeneem het, het minder mense hulle besoek.

Christa ·

Die bestel besluite vir wildediere. Respekteer wildediere en besef dat wildediere gevaarlik is. Dis mos genoeg Om na hulle te kyk, hoekom aan alles W vat en voel.

Ma ·

Stem saam Christa, dis wat my ma altyd gese het “hou jou hande af. As hy byt moenie by my kom huil nie!!”

Heksie ·

Dit moes in die eerste plek nie toegelaat geword het nie!
Hierdie is nie troeteldiere nie! Hulle behoort vrylik rond te beweeg in die natuur.
Hopelik besluit ander om hul voorbeeld te volg! Wel gedaan aan die nuwe eienaars.

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.