‘Raaiselmoord’ op man wat glo sy vrou vermoor

Birgit Human. Foto: Facebook

Birgit Human. Foto: Facebook

Die ondersoek na die moord op Birgit Human (52) het Saterdag ʼn bisarre wending geneem toe haar man, wat van haar moord beskuldig is, se liggaam langs ʼn treinspoor buite Odendaalsrus aangetref is.

Kapt. Steven Thakeng, woordvoerder van die polisie, het aan Maroela Media gesê Gert Human (51) se lyk is aangetref met ʼn enkele skietwond agter in sy kop. ʼn Tou is ook op die toneel gevind waarmee hy vermoedelik vasgemaak was. “Selfmoord is uitgeskakel en die polisie ondersoek ʼn saak van moord,” het Thakeng gesê.

Hy het gesê Human se motor is by die Goldfields-casino in Welkom gevind. Hy het glo vir sy dogter gesê dat hy by die casino gaan dobbel en dit is waar hy die laaste keer gesien is. “Ons vermoed iemand het hom by die casino ontvoer en hom na die treinspoor geneem waar hy vermoor is,” het Thakeng gesê. Hy kon nie bevestig of Human se persoonlike besittings gesteel is nie.

Human is kort voor sy dood van moord aangekla nadat Birgit op Vrydag 25 September dood op haar bed in die egpaar se huis in Virginia aangetref is. Sy het geen ooglopende beserings gehad nie en is vermoedelik verwurg.

Gert Human. Foto: Facebook

Gert Human. Foto: Facebook

Ao. Malebo Khosana, polisiewoordvoerder, het gesê Human is ook in die huis gevind met verskeie steekwonde aan sy bolyf. Die polisie beweer hy het homself met ʼn mes gesteek.

“Die egpaar het na bewering rusie gemaak en [Gert] het [Birgit] verwurg voordat hy haar liggaam op die bed neergesit het. Hy het daarna homself met ʼn mes oor sy hele lyf gesteek,” het Khosana gesê. Birgit se stiefseun het die polisie na die toneel ontbied.

Human is in die hospitaal opgeneem en vier dae later ontslaan. Hy is summier deur kapt. Ben Strydom in hegtenis geneem en van die moord op sy vrou aangekla. Human het daarna in die Virginia-landdroshof verskyn en is op borgtog van R5 000 vrygelaat.

Hy sou op 21 Oktober weer in die hof verskyn het. Niemand is nog in hegtenis geneem in verband met een van die moorde nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

26 Kommentare

jongste oudste gewildste
pop

Dalk het iemand gedink hierdie een gaan ook deur die krake val.

Sue

Hy het seker ñ paar rand gewen by die casino en is toe ontvoer en vermoor vir die geld? Daar behoort mos sekuriteirs kameras by die casino te wees? Dalk is dit self gereêl omdat hy nie kans gesien het vir die hofsaak en vonnis nie?

Pendoring

Die Polisie was lui met hulle eerste ondersoek. Hierdie gaan in alle waarskynlikheid as ‘n geval van selfmoord afgemaak word.

ladybug

Kan wees dat iemand wat haar geken het wraak geneem het deur hom te vermoor?

Christine

Sjoe dis sad, twee families wat met groot hartseer sit , dit klink soos aksie belaaide movie en nie werklikheid nie. Ek dink aan julle in my gebede.