Radio-aanbieder gepos oor suiwelbedryf-uitlatings

Daron Mann. Foto: Twitter

ʼn Aanbieder van Algoa FM in die Oos-Kaap is afgedank weens sy uitlatings oor die suiwelbedryf.

Daron Mann, een van Algoa FM se oggendprogram-aanbieders, is twee weke terug geskors voor hy die einde van die week via e-pos van sy afdanking in kennis gestel is.

Mann het op 27 September tydens ʼn gesprek met sy mede-aanbieder uitlatings oor die suiwelbedryf gemaak wat glo tot sy afdanking gelei het.

Mann het op die dag gepraat oor “Gee ʼn vegetariër ʼn drukkie-dag”. Hy het verduidelik dat hy self ʼn vegetariër is, maar dat hy tot sy spyt nog nie ʼn veganis is nie, aangesien die “suiwelbedryf afskuwelik” is.

ʼn Suiwelverskaffer wat op Algoa FM adverteer, het ʼn klag by die radiostasie aanhangig gemaak oor Mann se uitlatings.

Woodlands Dairy het intussen gesê dit is hy wat die klag by Algoa FM ingedien het. Die suiwelverskaffer het egter ontken dat hy instrumenteel was in Mann se afdanking. “Die beëindiging van sy kontrak was die besluit van Algoa FM.”

Mann het op sosiale media gesê “kontrakbreuk” is aangevoer as die rede vir sy afdanking en dat sy gewraakte uitlating ook opgehaal is.

Alfie Jay, besturende direkteur van Algoa FM, het aan Maroela Media bevestig Mann is afgedank. Volgens Jay het dit gevolg weens ’n wesenlike oortreding van sy plig om hom op ’n professionele en verantwoordelike manier te gedra. “Die inligting wat hy uitgesaai het, is nie deur hom gestaaf met feiteverwysings nie, en was ook nie gebalanseerd soos vereis deur die gedragskode nie.”

Rakende Woodlands Dairy se klag teen Mann het Jay gesê enige onderneming het die reg om vrae te vra oor uitlatings wat op die radiostasie gemaak word.

“Die besluit wat deur Algoa FM geneem is, het egter niks met ons kliënt se klag te doen gehad nie en was uitsluitlik ʼn kwessie tussen Algoa FM en Mann.”

Volgens Jay moet Algoa FM as ʼn gelisensieerde kommersiële uitsaaier ten alle tye verantwoordelik optree.

“Ons respekteer dit volkome dat mense individuele standpunte het. Die uitdrukking van ’n standpunt het egter die werklike en/of potensiële gevolg om die geldige en ewe belangrike belange van ’n ander te ondermyn.”

Jay het gesê radiopersoonlikhede kan nie die stasie gebruik om die publiek aan te moedig om hulle daarvan te weerhou om produkte te verbruik wat deur wettige en gereguleerde ondernemings geproduseer word nie.

“Die kommersiële lewensvatbaarheid van ons besigheid sowel as ons kliënte in enige bedryf, is afhanklik daarvan dat hierdie verantwoordelikheid ernstig opgeneem word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

74 Kommentare

jongste oudste gewildste
Heleen Botha

Landbou het genoeg vyande ons kan nie nog hanteer nie.

chris

Dankie Algoa FM.

Josephine

Dalk tyd dat die owerhede kyk na die plek se etikettering op hul produkte en veral hul aanspraak dat hul produkte vry is van patogene….is dit nie vals advertering nie?

humor

Wil julle hom ook maar nie n goue handruk gee nie. Of gee hom maar nog steeds sy volle salaris pensioen en alle byvoordele soos oa gratis besigheidsklasvliegkaartjies ens. Die staat stel mos darem n mooi voorbeeld.

Gaitsigubib

Goed so. Hoop mens hoor nie weer van hom nie.