Ramaphosa: Afsondering wys dieperliggende probleem in samelewing

Kospakkies wat aan taxibestuurders uitgedeel word (Foto: Amien Carelse/ANA)

Pres. Cyril Ramaphosa het Maandag in sy weeklikse nuusbrief gesê Suid-Afrikaners het die afgelope drie weke ontstellende tonele gesien waar desperate mense probeer om kospakkies by verspreidingspunte te ontvang, terwyl daar op talle plekke teen voedseltekorte betoog is.

“Daar kan geen groter ongeregtigheid in ʼn samelewing wees as dat sommige in gemak en oorvloed lewe, terwyl ander sukkel om met min of niks te oorleef nie.

“Dit is die oorblyfsels van ʼn gebroke en ongelyke verlede, asook ʼn simptoom van ʼn fundamentele mislukking in ʼn post-apartheid-samelewing. Die landwye algehele afsondering in reaksie op die koronavirus het ʼn probleem wat lankal bestaan, net baie vererger,” het die president gesê.

Volgens Ramaphosa is bewerings dat sommige mense, van hulle glo staatsamptenare, kospakkies opgaar of dit na vriende en familielede stuur, skokkend. Hy sê indien daar waarheid in die gerugte steek, sal daar streng teen amptenare opgetree word.

Die president het gesê Suid-Afrika het nog nooit met ʼn gesondheidskrisis van dié omvang te doen gehad nie – blitsige optrede was nodig om lewens te red. Die regering het wel besluit om oorversigtig te wees en danksy die afsonderingstydperk is die ruimte geskep om die infeksiekoers te verstadig en voor te berei vir ʼn moontlike skielike styging in die komende weke of maande.

“Talle lande wêreldwyd het koronavirus-afsonderingstydperke ingestel om lewens te red. Ons het dieselfde gedoen, maar ons afsonderingstydperk het ʼn hartseer fout in ons samelewing blootgelê wat wys hoe armoede, ongelykheid en werkloosheid ons gemeenskappe uitmekaar skeur.”

Ramaphosa het gesê die uitwerking op ʼn reeds wankelrige ekonomie moes ook in gedagte gehou word.

“Ons moes oorweeg wat die afsonderingstydperk sou beteken vir diegene wat nie salarisse verdien nie, vir diegene wat werkloos is en werk soek, vir seisoen- en stukwerkers, vir diegene in die informele bedryf, vir die armes en die kwesbares.”

Pres. Cyril Ramaphosa. (Foto: Presidensie/Twitter)

Ramaphosa het gesê selfs wanneer die afsonderingstydperk opgehef word, gaan die uitwerking daarvan nog lank gevoel word.

Diegene wat gelukkig genoeg is om ʼn vaste inkomste te hê, kan na hul werk terugkeer, maar vir miljoene ander gaan dit ʼn verlore maand wees waarin hulle tydelike werk kon vind, sake in die informele bedryf kon doen, of geld gespaar het om hul gesinsverantwoordelikhede na te kom.”

Ramaphosa het gesê voedselhulp is ʼn korttermynoplossing en hy het die talle organisasies en gewone Suid-Afrikaners wat ingespring het om te help, hiervoor bedank.

“Om honger te verlig is nie ʼn welsynsdaad nie. Dit is deel van enige samelewing wat berus op respek vir menseregte.”

Die president het gesê die regering gaan vandeesweek sy ingrypingsplanne afhandel om kwesbare burgers teen hongersnood te beskerm. “Van die vele uitdagings wat ons mense in dié tyd in die gesig staar, behoort die gedagte aan waar hul volgende maaltyd vandaan gaan kom, nie een te wees nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

41 Kommentare

jongste oudste gewildste
Alida

Dit maak mens woedend dat CR weer die verlede inbring. Die ANC het 26 JAAR gehad om almal gelyk te maak maar intussen is jong vroue betaal om kinders te kry en is daar toegekyk hoe die land gestroop word en nienand kon die strooptog stopsit nie. Alles wat gewerk het is geplunder en daar nooit n beperking van 2 kinders ten aansien van toelaes ingestel nie. Wie moet geblameer word? Nou na 26 jaar is daar te veel mense en te min kos en die boere is uitgemoor.

Anoniem

Ja mnr die president jy maak reels en se almal moet in hul huise bly. Nou bly ek in my huis en my werkgewer betaal my nie. Nou kry ek nie kos nie want ek is te wit. Jou regering gee my ook nie geld nie want ek is te wit. Jou UIF stuur vir my n epos en se ek het nie die regte prosedure gevolg nie. Dit is van my geld van 46jaar se werk wat in daai fonds is en ek weet my vorms is reg maar nee ek is te wit. Nou vra ek jou as… Lees meer »

Renata

Goeie hemel!!! En in 26 jaar kon julle nie die agterstand inhaal nie. Dis belaglik om hierdie agterstand en verhongering nou nog op die ou bedeling te plaas. As al die presidente en ministers van 1994 tot op huidiglike datum nie so gierig was en nie soveel onnodige poste geskep het met buitensporige salarisse nie, dan was hierdie nie nou so n groot probleem nie. Hoekom kan julle ANC nie erken dat hierdie hele situasie JULLE skepping en probleem is nie? Dit het NIKS met die verlede te doen nie. Dis pateties.

Boerkind

CR, sê net vir Suid Afrika wie het vir die laaste 20 jaar onverpoosd die eens vooruitstrewende land geplunder tot rommelstatus… dit is al wat jy hoef te doen. Dan praat jy van in oorvloed lewe?? Jy van alle mense?? Het jy geen skaamte nie?? Jy verwys na Apartheid, maar hoe lyk jou kommunistiese bestel?? Apartheid lyk soos ‘n kinderpartjie man!

Burgermeester

Luister Ramaphosa ooit na homself as hy praat? Dit is tyd dat ANC die splinter uit hulle eie oog moet begin haal. Die dieperliggende probleme is die ANC se te doen danksy 25 jaar se plundery en kader ontplooing.