Ramaphosa beloof swaarder strawwe vir misdaad teen vroue

Pres. Cyril Ramaphosa (Foto: Elmond Jiyane/GCIS)

Pres. Cyril Ramaphosa het swaarder strawwe vir diegene wat geweldsmisdade teen vroue pleeg beloof toe hy die land Donderdagaand in ‘n nasionale televisie-uitsending oor aanvalle teen vroue, kinders, buitelanders en die gay gemeenskap toegespreek het.

Hy het gelowiges ook gevra om die naweek te bid vir ‘n einde aan geweldsmisdaad in die land, en om hulself persoonlik daartoe te verbind.

Die register van seksuele oortreders gaan openbaar gemaak word en strenger minimumvonnisse vir mans wat vroue of kinders aanrand, verkrag of vermoor gaan ingestel word.

Die staat sal voortaan borgtog en parool vir diegene wat van geweldsmisdaad teen vroue of kinders aangekla word of tronkstraf daarvoor uitdien, teenstaan, met dien verstande dat hulle hul volle straf uitdien – veral as dit lewenslank is.

Sterker noodspanne, meer spesialishowe vir seksuele misdaadsake en meer rehabilitasieprogramme vir seksuele misdadigers in tronke is deur Ramaphosa in die vooruitsig gestel.

Hy het ook belowe om die hele staatsmasjinerie in te span om ander kwesbare groepe, by name die gay gemeenskap, teen misdaad te laat beskerm.

Hy het die parlement gevra om verdere noodmaatreëls teen geweldsmisdade teenoor vroue in te stel, maar geen besonderhede oor wat hy daarmee bedoel, bekend gemaak nie.

Druk van sommige Kaapse samelewingsgroepe om die doodstraf te laat terugbring is reeds op hoë vlak deur die ANC verwerp toe die minister van basiese onderwys, Angie Motshekga, gesê het: “Nee, nee, nee. Net God gee lewe, en net God besluit om dit te neem.”

Ramaphosa het gesê geweld teen vroue is nie ‘n vroueprobleem nie. Dit is ‘n mansprobleem. Dit is nie net ‘n nasionale krisis nie, maar ‘n misdaad teen menslikheid. “Dit maak nie saak wat ‘n vrou dra, doen, sê of waar sy loop nie, sy het die reg om veilig te wees,” het Ramaphosa gesê, en ordentlike mans lof toegeswaai.

Volgens die president laat die aanvalle op vroue mens twyfel aan die grondslae van ons demokrasie. Hy het die land gevra om saam te staan teen die euwel van geweldsmisdaad teen vroue.

Ramaphosa het die name van vroue wat die afgelope paar dae vermoor is, afgemete afgelees as huldeblyk. Hy het nie geskroom om te sê dit is mans wat hulle vermoor het nie.

Oor xenofobiese aanvalle op buitelanders het hy gesê die wrakstukke van xenofobiese geweld lê nog in Johannesburg, Pretoria, aan die Oos-Rand en in dele van KwaZulu-Natal. Tien mense is reeds dood en 423 in hegtenis geneem weens xenofobiese misdadigheid en ‘n verdere hoeveelheid is aangekeer weens onverwante vragmotorgeweld in KwaZulu-Natal.

Ramaphosa het mense gevra om op te hou om vals nuus, vals gerugte, vals video’s en ander stof op sosiale media te versprei want dit jaag spanning op, hits geweld aan en stel die land in ‘n swak lig.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

43 Kommentare

jongste oudste gewildste
Outoppie

Ek stem saam. Maar strawwe moet vir alle moorde en aanrandings werk

Agg

Praatjies praatjies praatjies. Wanneer bring hy verandering?

Ig

Minister Angie , word wakker , onskuldige mense sterf om jou, watse straf stel jy voor

Rina

Rehab ????? O my wordddddd hul doen dit weer en weer en wweeeer

Willem

Sover is daar so baie beloftes maar niks het nog verander nie