Ramaphosa lê wakker oor Eskom; gaan nie De Ruyter en Kie. in pad steek

André de Ruyter, uitvoerende hoof van Eskom.

Die Black Business Council (BBC) het ʼn beroep op André de Ruyter, uitvoerende hoof, en die Eskom-direksie gedoen om te bedank weens hul “onvermoë om die langdurige elektrisiteitsonderbrekings op te los”.

Eskom het Maandag fase 4-beurtkrag ingestel weens ʼn gebrek aan opwekkingskapasiteit. Dit sal in dié stadium tot Vrydag om 05:00 duur.

“Die BBC was uiters optimisties toe De Ruyter aangestel is aangesien Eskom stabiliteit nodig gehad het, maar het sedertdien besef dat die land twee jaar later niks anders het om te wys nie as die hoogste getal kragonderbrekings in die geskiedenis van ons geliefde Suid-Afrika,” het Kganki Matabane, die uitvoerende hoof van die BBC, gesê.

Volgens die BBC sal pres. Cyril Ramaphosa se ekonomiese heropbou- en herstelplan net ʼn droom bly aangesien dit afhang van die vermoë om die energiekrisis vinnig op te los. Eskom se leierskap het die land in dié verband gefaal.

Ramaphosa het egter Maandag tydens ʼn mediakonferensie gesê dat niemand se koppe gaan rol in verband met die voortdurende beurtkrag-situasie nie, ondanks beroepe in dié verband. Hy het gesê daar sal egter dopgehou word hoe Eskom se uitvoerende bestuur, asook die minister van openbare ondernemings en sy departement die situasie hanteer. “Dit is ʼn reuseprobleem wat nie net menselewens beïnvloed nie, maar ook die ekonomie.”

Volgens die BBC moet daar erken word dat Eskom se leierskap “heeltemal oorweldig, onbekwaam en uit hul diepte is”.

“Dit lyk asof hulle eenvoudig nie in staat is om hierdie krisis te hanteer nie en as sodanig moet hulle eerder bedank, aangesien daar blykbaar geen vooruitsig is vir enige verbetering van die ernstige situasie nie.”

Pres. Cyril Ramaphosa. (Foto: Skermskoot uit video/@CyrilRamaphosa
/Twitter)

Ramaphosa het toegegee die situasie met Eskom is verwikkeld. “Ons as nasie is in ʼn baie moeilike en onsekere situasie wanneer dit by beurtkrag kom. As daar iets is wat my snags wakker hou, dan is dit Eskom en elektrisiteitsopwekking.” Hy het gesê dit is nou die tyd van die jaar wanneer opwekkers hersien word en dat die situasie vererger word wanneer nog opwekkers breek en nie beskikbaar is nie.

Volgens Ramaphosa is dit ook ʼn probleem dat Suid-Afrika op ʼn enkele kragvoorsiener staatmaak. “So, die rigting waarin ons nou moet beweeg, is om Eskom te herstruktureer en ʼn aparte entiteit te hê vir opwekking sodat daar krag by ander entiteite aangekoop kan word. Die staat moet egter steeds die transmissie besit, maar dit is belangrik dat daar ʼn mate van mededinging is.”

Die BCC sê hy wil dringend met Ramaphosa en die minister van openbare ondernemings vergader om dié kritiek belangrike saak te bespreek.

“Die land ervaar sedert 2008 kragonderbrekings en 13 jaar later is daar steeds geen lig aan die einde van die tonnel nie. Die voortdurende verskoning van staatskaping, in plaas daarvan om die huidige probleem op te los, is oneerlik en afgesaag. Die onvermoë om Eskom te stabiliseer sal net daartoe lei dat die land verder afgegradeer word. Dít sal weer lei tot ʼn verhoging in werkloosheid wat reeds op rekordvlakke is, asook verdere ekonomiese inkrimping en die afskrik van internasionale beleggers,” het Matabane gesê.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

79 Kommentare

jongste oudste gewildste
Harley Davidson

Hoe rasisties black business council, daar sal oorlog wees as ek bv ‘n WBC stig het dit nie tyd geword om alle ras gekoppelde instansies,sport en sisteme te boikot en te beveg soos die ANC teen apartheid geveg het nie.

Tiptol

De Ruyter het ‘n vrot staats mpy gekry wat werknemers het wat die werk nie kan of wil doen nie. Hy kan nie man alleen almal se werk etiket verander nie. Hy moet die mag kry om almal af te dank en mense aan te stel wat die werk kan en wil doen. Ongelukkig is al daai mense blank, so dit gaan nooit gebeur nie. Dieselfde met munisipaliteite en al die staats departemente.

Alleen Wolf

Die BBC moet hulleself eers die vraag afvra wie in die eerste plek verantwoordelik was vir die verval van Eskom se infrastruktuur deur min of geen onderhoud nie.
Daar is ook geen aandag aan die uitbreidings planne van nuwe opwekkings eenhede gegee nie die fondse is eerder geplunder
Andre de Ruyter het immers al die skuldlas verlaag.
Die BBC het maar ‘n kort geheue.

Neelsie

28 jaar se verwaarlosing van die infrastruktuur wat ook al verouderd is en die plundering van Eskom se bronne, kan nie skielik oornag, binne 2 jaar reg gestel word nie. Dink die BBC hulle kan beter doen? Ek sien nie dat hulle ‘n oplossing voorstel as De Ruyter afgedank word nie! Wat dan?

Nici

Dalk moes Eskom 25 jaar gelede al onderhoud begin doen het.