Ramaphosa moet voor sy eie (kabinet-)deur vee

Pres. Cyril Ramaphosa het ‘n beroep op mense gedoen om die land te help skoonmaak en opbou. Talle mense het lankal reeds ingespring om te help. (Foto: GCIS)

Die DA sê terwyl pres. Cyril Ramaphosa Vrydagaand erken het sy regering was onvoorbereid op die grootskaalse geweld en plundering wat Suid-Afrika vroeër vandeesweek in ’n wurggreep gehad het, moes hy sommer ook die afdanking van Bheki Cele, minister van polisie, en sy eweknie by staatsveiligheid, Ayanda Dlodlo, aangekondig het.

“In enige ander demokrasie sou koppe ongetwyfeld gerol het vir dié opperste mislukking van intelligensie en voorbereiding,” sê John Steenhuisen, leier van die DA.

“As die veiligheid van Suid-Afrika bo eenheid in die ANC gestel word, moet Cele en Dlodlo die trekpas kry.”

Steenhuisen sê Ramaphosa het voorts erken dat die geweld en plundering doelbewus en ’n goed beplande aanval op die demokrasie was, maar versuim om te erken dat diegene wat dit georkestreer het, in sy eie party is.

Die DA-leier sê die ANC se faksiegevegte het nou na die strate van Gauteng en KwaZulu-Natal oorgespoel.

Ramaphosa het in gisteraand se toespraak ook ’n beroep op mense gedoen om die land se strate ná die afgelope week se gebeure te help skoonmaak en die land te herbou.

“Die president het ’n beroep op die land gedoen om saam te staan om die gemors op te ruim. Die eerste stap moet dan sekerlik wees om dié twee kabinetsministers af te dank wat so klaaglik misluk het in hul plig om Suid-Afrikaanse lewens, eiendom en inkomstes te beskerm,” sê Steenhuisen.

Hy sê nasionale veiligheid kan nie ondermyn word deur ministers wat nie hul werk kon doen nie.

Steenhuisen sê Suid-Afrikaners sal die “land help skoonmaak”, maar wil hê die president “moet sy kabinet skoonmaak van diegene wat die land in die steek gelaat het”.

Dr. Pieter Groenewald, leier van die VF Plus, eis ook stappe teen die betrokke ministers.

“Maandagaand was die president nog heeltemal in die duister oor presies wat die situasie behels en het verkies om tot groot mate die skuld op armoede en ongelykheid te pak,” sê Groenewald.

“Dit dien as bewys dat die land se intelligensiemagte aan die slaap betrap is. Die skuld is toe nog hoofsaaklik op misdadigheid gepak terwyl die president nou sê daar was wel mense en magte betrokke wat die land se demokratiese bestel wil vernietig.”

Groenewald sê die president erken dat nóg die polisie nóg die intelligensiedienste gereed was vir hierdie krisis.

“Die VF Plus verwag van die president om teen die betrokke ministers op te tree.”

Ramaphosa het in sy toespraak gesê 10 000 soldate is reeds ontplooi en nog 15 000 sal deur die loop van die naweek ontplooi word. Groenewald sê egter dit moes lankal gebeur het.

“Die president praat ook van soldate wat nog in sekere gebiede ontplooi moet word. Ook dít moes ’n week gelede reeds gedoen gewees het. Dieselfde fout wat egter ’n week gelede begaan is, word nou herhaal deurdat diegene wat volgens die president die onrus georkestreer en aangehits het, steeds nie agter tralies is nie,” sê Groenewald.

Groenewald sê volgens die president weet die veiligheidsmagte wie die opstokers is en dat hulle van oproer en hoogverraad aangekla moet word. Hy sê ook dit is onaanvaarbaar dat dié mense nog tyd gegun word om die onrus verder aan te blaas.

“Dat die land voor ’n krisis staan, is onbetwisbaar. Die tyd het nou aangebreek vir die regering om vir eens die regte ding te doen en ferm en genadeloos op te tree teenoor diegene wat die land in hierdie situasie gedompel het.

“Die VF Plus verwelkom dit dat die president die belangrike rol wat gemeenskapspolisiëringsforums ten tyde van hierdie anargie speel, erken. Daar moet ook seker gemaak word dat daar behoorlike koördinering is tussen die polisie en burgerlike veiligheidstrukture soos plaas- en buurtwagte.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

42 Kommentare

jongste oudste gewildste
Persheks Adri

ANC moet val!!! Almal is patete pffft kan nie eers ‘nn land regeer nie tsek!

Joe Olivier

Die een wat die ministers aangestel het moet ook maar waai. Die grootste probleem in die land, is die anc. Dr Groenewald, ek dink jy sal ‘n goeie president wees, ek nomineer u vir die pos.

Bernard

Ramaphosa, jou weermag en 90% van die polisie is net so pateties soos die anc-regering. Jou kastige weermag moes al dag 1 van die onluste ontplooi gewees het in brandpunte soos KZN. Dis onaanvaarbaar dat die grootste verpakkingshuis in die Suudelike Halfrond LEEG gestroop is en dit terwyl die polisie net toegekyk het en ook selfs deelgeneem het aan die stropery. Wat het daardie polisieman oorgekom wat met ‘n motor vol gestroopte goedere voorgekeer is ….. sekerlik niks nie. Komaan Ramaphosa, as dit nie vir al die civilians was wat woongebiede SELF beskerm het, was daar nóg groter chaos. Dit… Lees meer »

Jeff

Die VF SÊ. SÊ. SÊ. SÊ. SÊ EN DOEN iets

Johann Basson

President Ramaphosa en sy kabinetslede en ANC parlementslede kan gerus ook besems gryp en help met die oprium van die rommel en glasstukke. Ek het geen respek vir die ANC-leiers en EFF-leiers nie. Finish en klaar.