Ramaphosa: Padgebruikers moet houding verander

Pres. Cyril Ramaphosa tydens die bekendstelling van nasionale vervoermaand. (Foto: GCIS)

Suid-Afrika se paaie gaan nie enigsins veiliger word tensy mense hul houding as padgebruikers verander nie.

Só het pres. Cyril Ramaphosa Saterdag gesê tydens die bekendstelling van Vervoermaand by die N3-weegbrug naby Heidelberg in Gauteng. Ramaphosa het gesê veiliger paaie begin nie by meer polisielede nie.

“Veiliger paaie begin by hoe ons dink en voel en hoe ons reise as voetgangers, bestuurders, passasiers en fietsryers begin. Ons paaie gaan nie veiliger word tensy ons ons houding as padgebruikers verander nie,” het Ramaphosa gesê.

Die president het in sy toespraak gesê veiliger paaie begin deur veilige en gemaklike vervoer vir werkers te verskaf, pleks daarvan om groot getalle mense in oop voertuie te laai, terwyl menselewens en wetgewing verontagsaam word.

Hy het gesê veiliger paaie begin deur te verseker voertuie is padwaardig en te besef dat die pad aan niemand behoort nie, maar infrastruktuur is wat burgers deel, en dat daar wedersydse respek tussen wetstoepassers en padgebruikers moet wees.

“Ons het almal die reg om veilig te wees. Dit hang dus van elkeen af om daardie veiligheid deur sy of haar eie optrede te verseker. Ons moenie drink en bestuur nie. Nooit nie. Paaie word beveilig deur ons individuele sin vir verantwoordelikheid dat almal veilig by hul bestemmings gaan aankom, sonder beserings en sonder oortredings, boetes of vonnisse teen ons. Let wel, heeltyd,” het Ramaphosa gesê.

Die president het gesê dit moenie nodig wees vir gesinne om kruise te plant en kranse langs die pad neer te lê nie. Dit is kommerwekkend dat Suid-Afrika jaarliks steeds sowat 14 000 padsterftes het. Benewens die groot verlies aan menselewens, is daar ook ʼn beduidende finansiële koste verbonde aan ongelukke: dit kos die land jaarliks ʼn geraamde R147 miljard.

“Ons moet die ongelukkige situasie verander om die onthalwe van die welstand van ons mense en die produktiwiteit van ons land. Suid-Afrika het hom verbind tot die Verenigde Nasies se Dekade van Optrede vir Padveiligheid, wat padsterftes en ongelukke wil verminder,” het hy gesê.

As deel van dié verbintenis, het die regering verskeie maatreëls ingestel wat ʼn beduidende verandering moet teweegbring in die manier waarop padveiligheidskwessies aangepak word.

Die bekendstelling van nasionale vervoermaand. (Foto: GCIS)

Die Wysigingswetsontwerp op die Administratiewe Beregting van Padverkeersmisdrywe (Aarto) is een van die ingrypings om ʼn meer doeltreffende skakel tussen wetstoepassing en ʼn regverdige en deursigtige te verseker, het Ramaphosa gesê.

Aarto bevorder verantwoordelike gedrag op paaie deur die skep van ʼn puntestelsel vir bestuurders.

Hiermee volg Suid-Afrika die voorbeeld van ʼn groeiende aantal lande wêreldwyd waar die gevolge van verkeersoortredings in mense se sakke, hul inkomste en lewe gevoel word.

Ramaphosa het ook sy kommer uitgespreek oor die aanhoudende beskadiging van verskeie openbare bates op verskeie plekke in die land en pendelaars se blootstelling wanneer hulle van openbare vervoer gebruik maak.

“Tydens Vervoermaand in Oktober nooi ons Suid-Afrikaners weer om openbare vervoer te gebruik, voertuie te deel en fiets te ry en te stap wanneer moontlik – nie net om verkeersopeenhopings en koolstofuitlaatgasse te verminder nie, maar ook om met mekaar kennis te maak as burgers wat ʼn wonderlike land deel.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

40 Kommentare

jongste oudste gewildste
Werner

As Ramaphosa en die blou ligte van die pad af bly, is dit reeds veiliger

Wie het gerook

Begin by die taxies

Chris Ws

Blah -blah-blah en daar gaan die rand weer waarde verloor.Hy het nie ‘n benul waarvan hy praat nie.Sy minister van vervoer nog minder.
Ek wil SIEN hoe gaan AARTO ‘n onbevoegde en ‘n padwet oortredende bestuurder reg maak.

Jan Alleman

Mooi. Gedoen. Hy en sy ministers kan gerus ‘n voorbeeld stel en ophou jaag op die snelweë. Nog beter. Ry bietjie publieke vervoer vir die duur van jou ampstermyn.

Nou kan hy maar al die staat kapers bietjie tronk toe stuur. Kom ons kyk of hy iets daaraan kan doen.

schaun

Die probleem is jy kan n miljoen wetstoepassers aanstel as hulle nie hulle werk met integriteit doen nie gaan niks verander nie dieselfde met die polisie.