Ramaphosa steek stokkie voor stryery op Twitter

Pres. Cyril Ramaphosa Foto: Jairus Mmutle/GCIS

Pres. Cyril Ramaphosa het Saterdag Fikile Mbalula, minister van vervoer, Tito Mboweni, minister van finansies, en David Makhura, Gautengse premier, beveel om ʼn oplossing vir die ongewilde e-tol‑stelsel op Gautengse snelweë aan die kabinet voor te lê.

Die president het in ʼn verklaring gereageer op verskeie twiets wat Mboweni vandeesweek aan Makhura gerig het rakende sy opmerkings oor e-tol tydens sy provinsiale toespraak.

Maroela Media het vroeër berig Makhura het vandeesweek in sy provinsiale rede gesê die e-tol‑stelsel het geen toekoms in Suid-Afrika nie. Mboweni stem egter nie hiermee saam nie en het dit in reaksie daarop in verskeie twiets duidelik gemaak dat dié stelsel nêrens heen gaan nie.

Ramaphosa het in ʼn verklaring gesê hy is bewus van dié twiets wat in ʼn bekgeveg tussen die twee hooggeplaastes ontaard het. Hy het gesê dit is jammer dat die publiek hul meningsverskille moes sien.

“Die president is van mening sulke reaksies op sosiale media is onbetaamlik en dat hulle versuim het om die leierskap wat in hierdie geval nodig is, te verskaf,” lui die verklaring.

Volgens Ramaphosa is die kabinet die geskikte platform om verskille uit te sorteer; nié sosiale media nie.

Hy het die ministers en die premier tot die einde van Augustus kans gegee om met ’n oplossing vir e-tol vorendag te kom.

Mboweni het sedertdien van sy vurige twiets verwyder.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

26 Kommentare

jongste oudste gewildste
sweis

Skrap dit, dit werk nie sal ook nooit werk nie ,net soos die diskriminerende wette teen wit minderhede skrap dit onmiddelik.

Pensioenaris

Het onse Prez uiteindelik ontwaak en agtergekom dat daar iewers fout is??? Hopelik sal die plaasmoorde ook nou tot hom deurdring….. Word asb wakker en wys wat in jou steek, mnr die. Prez. Tot dusver het jy ons nog net teleurgestel.

Hettie

Mooi man !so hy kan praat !
Hoop hy doen dit nou met almal wat hulle verbeel hulle het ‘n sê!

Andreas

MAAR toe gebruik hy self twitter! As hy dan die onenigheid of verskille van die ANC van die sosiale media wil weghou, waarom trap hy dan self in die slaggat, waarom gebruik hy nie ANC/Regering kanale of selfs SMS of WhatApp nie? Gaats, hy kon hulle ook maar gebel het. Staatsman … blyk ek liewer verder stil.

Plattelander

Maak die e-tol dat dit werk. As dit nie werk nie gaan die koste weer net by die brandstof prys gevoeg word, dan moet ons wat vêr op die platteland woon help betaal aan paaie wat ons nooit op ry nie. Ons eie paaie is al reeds in totale verval. Ons sal die tol betaal as ons die hoof sentra besoek.