Ramaphosa wil korrupsie in gesondheidsektor uitroei

Pres. Cyril Ramaphosa tydens Dinsdag se bekendstelling van die forum. (Foto: GCIS)

Pres. Cyril Ramaphosa het Dinsdag ʼn teenkorrupsieforum vir die gesondheidsektor by die Uniegebou in Pretoria bekend gestel en het gewone Suid-Afrikaners, burgerregtegroepe én die media gevra om die vlaag bedrog en korrupsie in die sektor vreesloos te help pak.

“Ek wil alle nieregeringsorganisasies bedank wat die regering op sy tone hou. Ek wil julle aanmoedig om, waar die regering tekort skiet, ons op ons tone te hou omdat julle dit namens die mense van ons land doen. Ja, julle in die media ook. As daar voorvalle van wanbestuur en korrupsie is, moet julle nie stilbly nie. Ons moet hierdie goed aan die groot klok hang,” het Ramaphosa gesê.

“In ons pogings om Suid-Afrika op te ruim en te verseker die land is korrupsievry, het ons deursigtigheid nodig. Ons soek verantwoordbaarheid en dié ooreenkoms gaan die hele proses ʼn hupstoot gee. Aan diegene in die strafregstelsel wat hier teenwoordig is: hou aan om julle werk sonder vrees, vooroordeel of guns te doen. Ons moet die gesondheidsorgstelsel regruk.”

Die forum is ʼn samewerkingsprojek tussen verskeie belanghebbendes in die stryd teen bedrog en korrupsie in die gesondheidsorgsektor. Dit sluit wetstoepassingsagentskappe en burgerregtegroepe in.

Dit is op die been gebring ná die ondertekening van ʼn ooreenkoms verlede jaar wat die regering en sy maatskaplike vennote daartoe verbind om die land se sukkelende gesondheidsorgstelsel reg te ruk.

Ramaphosa het gesê die private en openbare gesondheidsektor is vatbaar vir bedrog en korrupsie weens die groot en wisselende getal transaksies vir goedere en dienste. Die bedryf word ook geteister deur onder meer bedrieglike bestellings, tenderongerymdhede, omkopery, opgeblaaste pryse, swak bestuur en mense wat vervalste kwalifikasies voorhou.

Suid-Afrikaners sukkel boonop om toegang tot selfs net basiese mediese dienste te kry.

“In die maande voor die nasionale verkiesing het ek oor die land gereis en met baie mense gepraat en besef wat hulle daaglikse uitdagings is. Dit was sleg – en dit moet vir elke burger in dié land ook sleg wees – om te hoor hoe dié mees basiese reg, toegang tot basiese gesondheidsdienste, deur korrupsie geraak word.

“In sommige dele van die land word mense gedwing om méér te betaal as die amptelike fooi vir toegang tot sekere mediese behandeling, óf hulle moet betaal vir dienste wat eintlik gratis is.

“Op sommige plekke word ouers of bejaardes weggewys omdat dokters en verpleegkundiges tydens werksure elders gaan werk. Dít, terloops, is korrupsie. Hulle doen dié ekstra werk en verwaarloos die pasiënte na wie hulle eintlik moet omsien.”

Ramaphosa het gesê in ander gevalle word staatshulpbronne en eiendomme, waaronder hospitale en klinieke, uitverhuur.

Verskeie ministers, LUR’e, wetstoepassers en nieregeringsorganisasies het die bekendstelling van die forum bygewoon.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

42 Kommentare

jongste oudste gewildste
piper

bla bla bla. praat net en doen niks. wie is al ooit tronk toe vir korupsie. al die dinge by die zondo kommiesie en al die vorige kommiesies word noks aan gedoen nie.

Waarheid

Ag asseblief jy kan nie eers jouself uitroei nie.
Wat nog iets anders?
Hoeveel is al tronk wat korrup is en was?
En die geldjies wat JY ontvang het?
Sorry pel ek het geen respek vir jou nie want jy beteken niks en is n leuenaar.

Johan

CR moet by die staatshospitale begin. Dis waar die meeste korrupsie voorkom. Ek dink dis maar praatjies om die staats-oorname van die private gesondheidsdienste te regverdig….

Ig

Dit is duidelik dat hy iewers begin??? Die is die beste grap van 2019 tot dusver. Die ondersoek gaan seker 3 jaar neem en dan nog 5 jaar voordat iemand dalk vervolg sal word en onskuldig bevind word daarna lol

Thys

Ramaphosa wil. Maar doen nie! Na byna 2 jaar is nog nie n enkele korrupte afgedank, of toegesluit nie. Ramaphosa wou, maar het nie!!