Ramptoestand wéér verleng, IRR maak beswaar

(Argieffoto: Facebook)

Nkosazana Dlamini-Zuma, minister van samewerkende regering en tradisionele sake, het onlangs egter wéér die ramptoestand verleng – tot 15 Desember. Dit is nou reeds amper twee jaar dat die ramptoestand voortduur en die Instituut vir Rasseverhoudinge (IRR) het nou dié besluit as “skadelik en strydig met feite” gekritiseer.

“Die afgelope maand was Suid-Afrika se Covid-19-sterftes tien keer minder as wat dit tydens die tweede vlaag was. Tans is daar gemiddeld 0,6 sterftes per dag per miljoen mense. Dít, in teenstelling met die dodetal van meer as ses mense per dag per miljoen mense tydens die tweede vlaag,” het die organisasie Dinsdag in ʼn verklaring gesê.

Volgens die IRR se ontleding van die statistieke het Suid-Afrika tans die laagste aantal Covid-19-sterftes en -getalle op rekord sedert die hoogtepunt van die eerste vlaag in Julie verlede jaar. Toe het Suid-Afrika 200 gevalle en gemiddeld vier sterftes per miljoen mense aangeteken.

“In vergelyking met die kritieke bedreiging wat Covid-19 in die verlede ingehou het, dui die syfers daarop dat die huidige situasie nie ʼn nasionale ramptoestand noodsaak nie,” het Michael Morris, woordvoerder van die IRR, gesê. Hy wys ook daarop dat sterftes wat nié met Covid-19 verband hou nie, tans 100 maal meer is as dié wat wel met die virus verband hou.

Intussen het AfriForum ook Maandag die aandklokreël as “irrasioneel” beskryf en geëis dat dit afgeskaf word.

Gabriel Crouse, verbonde aan die IRR, sê: “Om dit ʼn ramptoestand te noem, is absurd. Dit vererger rampvoosheid, wat beteken as buitengewone maatreëls in die toekoms vereis word, mense minder geneig sal wees om dit ernstig op te neem. Die seun wat ‘wolf-wolf’ geskree het, het dit besef, maar nie Dlamini- Zuma nie.”

Die IRR plaas die verlenging van die nasionale ramptoestand binne die breër tendens van magsmisbruik deur die departement. “Hierdie misbruik is vroeër in Augustus 2021 gedemonstreer toe minister Dlamini-Zuma probeer het om die uitstel van nasionale munisipale verkiesings af te dwing. Die IRR se waarneming dat haar proklamasie irrasioneel was, is deur die konstitusionele hof bevestig. Net soos in die verlede, sal die minister nie sonder openbare druk van haar uitvoerende supermagte afstand doen nie,” meen Morris.

Die IRR se regsverteenwoordigers het reeds verlede week aan die presidensie geskryf en gevra of die nasionale bevelsraad oor die koronavirus aan selfs die mees basiese vereistes van professionele staatsgedrag voldoen, insluitend die invul van ʼn bywoningslys, die bewaring van vergaderingnotules en ʼn formele struktuur van stemming oor gevolgtrekkings. “Tot op hede het die IRR geen antwoord op hierdie mees basiese vrae ontvang nie.”

AfriForum het ook gevra vir redes waarom die aandklokreël nog toegepas word, sowel as bewyse ter ondersteuning van die effektiwiteit daarvan as voorsorgmaatreël teen Covid-19. Dlamini-Zuma is versoek om teen 19 November hierop te reageer.

Crouse meen ook die verlenging van die ramptoestand verskans die bevelsraad bo en buite strukture van parlementêre toesig, en normaliseer die idee dat Suid-Afrika via die bevelsraad ʼn regering het wat op ʼn “onbegryplike wyse” oor sy mense regeer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

31 Kommentare

jongste oudste gewildste
Baardman

Daar sal moet daadwerklik opgetree word teen hierdie korrupte regering. Praat en vrae vra help nie.

Diline

Hulle maak mos nou voorsorg vir die volgende “Vlaag”. Hulle is mos sieners om voorruit te kan sien dat die 4de vlaag ons in Desember weer gaan tref.

Anel

Sodat dit vir hulle msklik sal wees om weer op 4Desember ‘n algehele vlak 4 of 5 “lock down” kan toepas. Die spul is mal verby!!!

Johann

Dit gaan nie vir KOPDOEK oor feite of statistieke of regte of reg of verkeerd nie. Dis DIE grootste voorbeeld van die ANC en sy MAGSMAL KADERS wat n land in die afgrond insleep agter hulle ideologiese behepthede. En eenvoudig onaantasbaar!

Renier johannes

Wil ons manupileer moet stop gesit word ons het n reg