Randfontein-moorde: Brittanje genader oor ‘anargie’ in SA

Die vier slagoffers wat vermoor is.

Die vier slagoffers wat vermoor is.

Die VF Plus het ʼn beroep op die Britse regering gedoen om met die party in gesprek te tree nadat een van dié land se burgers, Monty McCormack (73), saam met sy seun, dié se verloofde en haar dogter op ʼn kleinhoewe aan die Wes-Rand vermoor is.

Kennith McCormack (42), sy verloofde, Marietjie Meyer (45), haar dogter, Kayla (9) en McCormack sr. se liggame is verlede Donderdagaand op ’n kleinhoewe buite Randfontein gevind. Daar word vermoed dat hulle tussen Woensdagaand en Donderdagoggend vermoor is. ʼn Familievriend het Donderdagaand die polisie ontbied nadat hy op McCormack sr. se bebloede liggaam afgekom het.

Die verdagtes het met die gesin se Mercedes-sportnutsvoertuig gevlug. Die voertuig is later verlate aangetref en die polisie het beslag daarop gelê. Volgens gerugte is kontant en twee selfone van die slagoffers daarin gevind.

Kapt. Tshekiso Mofokeng, provinsiale polisiewoordvoerder, het Dinsdag aan Maroela Media gesê die polisie ondersoek nog hoeveel mense by die aanval betrokke was, hoe die slagoffers vermoor is en of daar enigiets geroof is.

“Die vlakke van geweldsmisdaad in Suid-Afrika grens aan anargie, en die VF Plus gaan die Britse regering op die hoogste vlak deur sy hoë kommissaris in Suid-Afrika versoek om met Suid-Afrika se regering hieroor in gesprek te tree,” het adv. Anton Alberts, VF Plus-LP en leier in Gauteng, gesê.

Adv. Alberts het gesê die Randfontein-kleinhoewemoorde is absoluut skokkend en daar kan geen regverdiging hoegenaamd daarvoor gevind word nie.

“Die groot aantal moorde, verkragtings en aanvalle tot dusver vanjaar dui daarop dat die regering bykans magteloos staan voor gewelddadige elemente in die land. In die twee jaar tot einde 2015 het moordkoers met 9,6% gestyg en daar was die afgelope paar jaar meer as 17 000 moorde jaarliks in Suid-Afrika. In 2014 was daar volgens die regering se eie statistiek 17 805 moorde. Dit is ʼn moord elke 30 minute.”

Hy het gesê daar kan geen twyfel meer wees nie dat dit aan anargie grens. “Die statistieke wys duidelik Suid-Afrika is ʼn oorlogsone, ʼn oorlog teen misdadigers en moordenaars waar mense toenemend onveilig in hul eie huise voel,” het hy bygevoeg.

Alberts het gesê aangesien ʼn Britse burger een van die vermoordes is, het die VF Plus die voorval gebruik om ʼn brief aan die Britse hoë kommissaris te skryf oor geweld en misdaad in die land.

“Die kommissaris word in die skrywe versoek om die saak op te neem met die Britse premier en minister van verdediging en om dit met Suid-Afrika se regering te bespreek. Indien nodig, sal die VF Plus na Brittanje reis om hierdie gesprek daar verder te voer. Die mense van Suid-Afrika kan nie langer in sulke abnormale omstandighede ʼn normale bestaan voer nie.”

Niemand is nog in verband met die moorde in hegtenis geneem nie. Die ondersoek duur voort.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

87 Kommentare

jongste oudste gewildste
wynand

Dankie tog – iemand gaan dit verder vat!
hoop U kom reg en dat hulle sal luister en ook verder neem!!
Dankie

Marlene Dilger

Sjoe dis verskriklik ons almal se vraag is hoekom? Ek dink dis goeie aanduiding om uit te reik na Buiteland want werklik ons SA is te slapgat!!

KP

Daar gaan absoluut niks van kom nie. Net nog moorde op die wit bevolking van SA.

Kaspaas

Brittanje sal niks doen nie. Dit is dan die eindste nasie wat duisende Afrikaner vroue en kinders in konsentrasie kampe ‘vermoor’ het.

willie

Hoe klim ons agter hulle in en gee hulle behoorlikke ondersteuning?