‘Rassistiese’ generaal amptelik aangekla

Sandra Malebe-Thema. Foto: Facebook

Sandra Malebe-Thema. Foto: Facebook

Die generaal wat glo tydens ʼn byeenkoms by die Suid-Afrikaanse Polisiediens (SAPD) se opleidingsakademie in Oudtshoorn, haarself aan rassistiese en vernederende opmerkings teenoor verskeie opleidingspersoneellede skuldig gemaak het, is aangekla.

Die vakbond Solidariteit het vandag ’n formele klag teen die hoof van basiese polisie-ontwikkeling, genl.maj. Sandra Malebe-Thema, by die Menseregtekommissie (MRK) in Kaapstad ingedien.

Solidariteit het 22 beëdigde verklarings ontvang van partye wat by die voorval betrokke was en waarin Malebe-Thema se vernederende en rassistiese opmerkings bevestig word. “Bo en behalwe die onvanpaste opmerkings oor die geselekteerde groep personeellede se kleredrag en gewig, is die rassistiese uitsprake wat sy gemaak het selektief en onaanvaarbaar,” het Anton van der Bijl, hoof van Solidariteit se Sentrum vir Billike Arbeidspraktyke, gesê.

“Volgens inligting wat ons ontvang het, het Malebe-Thema die diens van die Suid-Afrikaanse Polisiediens (SAPD) onder raaiselagtige omstandighede verlaat. Sy het in daardie stadium die rang van brigadier beklee. Malebe-Thema is sedert 1 Maart 2016 weer, in die rang van generaal-majoor, aangestel. Ons is tans besig om ondersoek in te stel na die redes waarom sy destyds die diens verlaat het,” het Van der Bijl verduidelik.

Volgens Van der Bijl het Malebe-Thema by die geleentheid aangevoer dat daar te veel wit gesigte is wat posisies in opleiding beklee en dat sogenaamde diskriminasie teenoor swart studente beëindig sal word. Sy het na bewering dit onder meer gestel dat wit personeellede wat in sekere afdelings werksaam is hulself reeds ’n geruime tyd lank onregmatig verryk. “Sy het pertinent gemeld dat die wit instrukteurs rassiste is wat die studente onder hul bevel onregmatig hanteer,” het Van der Bijl gesê.

Solidariteit vra in die klag dat die SAPD Malebe-Thema dissiplinêr verhoor om op dié manier verantwoording te doen vir haar rassistiese uitsprake. Sy moet ook billike kompensasie aan al die betrokke personeellede wat deur haar beledig en verkleineer is, betaal. ʼn Openbare verskoning deur Malebe-Thema aan die betrokke personeellede word ook deur die vakbond versoek. Laastens dring Solidariteit daarop aan dat die generaal-majoor binne ’n maand vanaf die bevindingsdatum, ʼn program oor rasseverhoudings in Suid-Afrika moet bywoon.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

47 Kommentare

jongste oudste gewildste
Adam Boshoff

Was dit al op die tv se nuus kanale!!!!

Juan

Ons weet amal wat hier gaan gebeur.. en dit is mooi NIKS nie..

lettie

Daar is geen melding gemaak op die hoofnuusstrome. Wel van n sg rassistiese seksuele teistering by n wynberg skool. Ek is stomgeslaan. Waarom is daar net n obsessie oor wit mense? Is ons dan so belangrik dat elke stap van ons met n valkoog dopgehou word en uitbasuin word aan die wereld?

Brie-brie

Sy kan ook maar ‘n boeta betaal nes die ander persone betaal het vir die rasistiese opmerkings. Wat goed is vir die een, is netso goed vir die ander een ook.

PJ

Niks sal gebeur inteendeel sy gaan bevorder word