Rèan en Rox-Zee verbreek verlowing

Rèan en Rox-zee (Foto; Instagram)

“Ons is nog lief vir mekaar. Ek was bereid om my hele lewe agter te laat vir hom, maar hulle het ons verhouding in die grond ingedryf. Dit is nié Rèan se skuld nie.”

Ja, Rèan en Rox-Zee, een van die gewildste paartjies in Boer soek ʼn vrou, kykNET se werklikheidsreeks, is amptelik uitmekaar nadat hulle net vroeër vandeesmaand verloof geraak het.

Rox-Zee het Vrydag op Instagram aangekondig dat sy en Rèan nie meer verloof is nie omdat sy ouers nie hul verhouding goedgekeur het nie.

“Ek is die een wat die verlowing verbreek het,” het Rox-Zee aan Maroela Media vertel. Sy vertel dat die verlowing reeds verlede week verbreek is, maar volgens haar kom dié ding al ʼn hele ruk.

Sy vertel dat sy verlede jaar, kort ná die einde van die verfilming van die reeks, by Rèan op die plaas naby Groblershoop in die Noord-Kaap gekuier het. Sy het toe al op sy selfoon ʼn boodskap gesien waarin sy ouers vir hom sê dat dié Engelse meisie nie op die plaas sal aard nie.

“Hulle het gesê hy maak ʼn groot fout om met my uit te gaan en dat ek nooit op die plaas sal aanpas nie.”

Volgens Rox-Zee was Rèan gedurig in die middel en moes hy herhaaldelik verduidelik dat hy haar lief het en dat sy ouers die verhouding moet aanvaar.

Toe Rèan vroeër vandeesmaand op pad Durban toe was om sy “Rox” se hand te vra, het sy ouers wéér ʼn boodskap gestuur om te sê dat hulle nie die verhouding goedkeur nie. Sy vertel dat dit op die ou einde net te veel geword het, waarna sy besluit het om die verlowing te verbreek.

Rèan is gebroke, vertel sy.

“My hart is gebreek. Ek wóú op die plaas bly. Ek het al maande lank meubels vir ons huis op die plaas gekoop. Ek het klaar my trourok gekoop, maar hoe gaan dit werk as hulle my nie aanvaar nie?”

“Die laaste week was nie maklik nie, maar mense moet weet dat dit verby is,” sê ʼn hartseer Rox-Zee.

Rèan het aan Maroela Media gesê hy het geen kommentaar nie behalwe dat dit bloot nie tussen hulle uitgewerk het nie.

Maroela Media het vroeër berig die paartjie het op 6 April verloof geraak nadat hulle tydens die 11de seisoen van die reeks ontmoet het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

147 Kommentare

jongste oudste gewildste
Mel

Selfsugtige ouers

Ida

Ag nee dis nou regtig nie goeie nuus nie. Hoekom ouers inmeng in hul kinders se liefde lewe gaan my verstand te bowe. As hy gelukkig is met n Engelse vroutjie is dit mos sy saak. Hul was so spontaan gelukkig. Kyk ek is verstom.

Nicolett

ROX, Vat hom terug. Jy trou nie met sy ouers nie, jy trou met hom. Hyt jou gekies en hulle moet maar met dit deal.
Ek bid en dink aan jou.
Sterkte

Maryke Burger

Rean en Rox. Onthou wat ek vir jou se Rox. As sy ouers jou nie da wil he nie……..los my engelvrou…..los. huil liewer nou . Voor jul kinders kry. Jy sal nooit ooit goed genoeg wees nie. Ek weet. Is al 24 jaar in dit. Los. Jul was so so n pragtige paartjie. Siestog

TinRSA

Ouers ken hulle kinders. Liefde is blind maar trou sit die bril op. Dalk maar die beste vir hulle. Self nie gedink dit is die regte match nie.