Reddingspanne ‘sal nie ophou soek’ na vermiste vissermanne

Die omgeslaande vissersboot, die Maredon, in die see nadat die boot naby Kaap St. Francis in die Oos-Kaap omgeslaan het. Foto: NSRI

Pres. Jacob Zuma het Woensdag gesê reddingswerkers sal nie ophou soek totdat die agt vissermanne, wat vermis word nadat hul boot Sondag in die see naby Kaap St. Francis in die Oos-Kaap omgeslaan het, gevind word nie.

Zuma het in ʼn verklaring sy medelye uitgespreek teenoor die familie van die visserman wie se liggaam Sondag deur reddingswerkers uit die water gehaal is. Die president het ook sy ondersteuning uitgespreek teenoor die families van die agt vissermanne wat steeds vermis word en het ʼn beroep op reddingspanne gedoen om voort te gaan met die soektog totdat die vermiste mans gevind word.

“Ons gedagtes en gebede is met die familie in hierdie donker en beangste tyd. Ons wil hulle gerusstel dat die reddingspanne nie sal rus totdat die vermiste lede van hul families gevind is nie. Ek wens ook die gehospitaliseerde vissermanne sterkte en ’n vinnige herstel toe,” het Zuma gesê.

Maroela Media het vroeër berig ʼn tjokka-boot met 16 vissermanne aan boord het Sondag omstreeks 03:30 omgeslaan. Sewe vissermanne is later lewend op ʼn strand gevind en ses van hulle is gehospitaliseer. Een van die vissermanne se liggaam is langs die kuslyn naby Sunset Rocks gevind.

Sers. Majola Nkohli, woordvoerder van die polisie, het gesê ʼn soektog na die agt vermiste vissermanne het sedertdien nog niks opgelewer nie. Die soektog is vanoggend weer voortgesit. “Reddingswerkers en ander rolspelers het die soektog Dinsdag na Ashtonbaai en Paradise-strand uitgebrei, wat ongeveer 30 km vanaf Thyspunt is, die plek waar die boot omgeslaan het,” het Nkohli gesê.

“Die soek-en-reddingspanne gaan vandag voort om die kuslyn te fynkam. Daar is ook ʼn span vrywilligers wat met die soektog help.”

Nkohli het gesê vrywilligers wat graag met die soektog wil help, kan kapt. Johan Du Toit by  071 475 1831 kontak.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

Een kommentaar

Estelle Potgieter ·

Hartverskeurend! Hoeveel gesinne sonder broodwinner en ‘n gemeenskap in rou gedompel. My hart breek…..

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.