Reën veroorsaak vertragings by Mooikloof-substasie

Herstelwerk aan die Mooikloof-substasie (Foto: Stad Tshwane/Twitter)

Stad Tshwane se spanne het Saterdagmiddag goeie vordering gemaak by die Mooikloof-substasie. Dié substasie moes herbou word ná ʼn brand op 1 Desember uitgebreek het.

Inwoners van Moreletapark, Pretoriuspark, Olympus, Bosveld en ʼn deel van Garsfontein is al dae lank sonder kragtoevoer.

Maroela Media het vroeër berig ongeveer 60% van die huishoudings se elektrisiteit sou na verwagting teen Saterdagaand aangeskakel wees.

“Die stad het begin om ongeveer 60% van die kliënte aan te skakel, maar die proses sal waarskynlik tot vroeg Sondagoggend vertraag word weens reën,” het Hilgard Matthews, woordvoerder van Stad Tshwane, Saterdagaand in ʼn verklaring gesê. Die spanne kan nie aan die hoogspanningkabels werk wanneer dit reën nie.

“Die veiligheid van die personeel moet ʼn prioriteit wees. Hulle kan nie aan lewendige toerusting raak wanneer dit reën nie, die risiko is te groot.”